Чуулганы завсар зайгаар улс төрийн амьдралыг уйдаагаагүй Ц.Нямдорж сайдтай холбоотой ээлжит сенсаци “Сайд ба сэтгүүлч” нэвтрүүлгээр үргэлжиллээ. Тэрбээр өөрийг нь АТГ-аар шалгуулж байгаа МоАХ-ны тэргүүн Х.Баттулгыг жинтэй хэдэн үгээр хатгаад авсан. Авлига авсан, нууц гэрээ хийсэн гэж бие биенийгээ буруутгаж байгаа тэднийг халз мэтгэлцэж, учир зүйгээ олж болох талаар сэтгүүлч асуухад “Үнэнийг хэлэхэд надад Х.Баттулга улс төрчийн хувьд ч, төрийн ажлын дадлага туршлагын хувьд ч ёстой сонирхолгүй субьект. Х.Баттулгатай мэтгэлцэх юм бол хэтэрхий доошоо орсон хэрэг болно” гэсэн хариулт өгсөн.

    Үүний зэрэгцээ тэрбээр З.Энхболд гишүүнийг “хуулийн ТМС” төгссөн, диплом худалдаж авсан гэж цоллосон нь АН-ын гишүүдийн төдийгүй энэ сургуулийг төгссөн хүмүүсийн дургүйцлийг өдөөв. Өөрөө Ленинградын Улсын их сургуулийг төгссөн Хууль зүйн сайд МУИС-ийн төгсөгчийг  дорд үзсэнд З.Энхболд гишүүн твиттер хуудасдаа  “Ц.Нямдорж одоо ч гэсэн МАН-ын номер нэг хуульч, даанч өнгөрсөн зуунд хуулийн сургууль төгссөнөөс өөр мэдлэгээ дээшлүүлээгүй” гэж бичжээ. Үүгээр зогсохгүй АН-ын “Цахим ардчилал” онлайн хэлэлцүүлэгт оролцох үедээ “Намайг диплом худалдаж авсан гэж Ц.Нямдорж хэлсэн. Би тайлбар хий гэж байгаа. Үгүй бол гүтгэлэг гээд шүүхэд өгнө” гэж эрс мэдэгдэв. Түүний ойрын эх сурвалжийн хэлж байгаагаар УИХ-ын гишүүн З.Энхболд Хууль зүйн сайдыг энэ долоо хоногт багтаж “нэр төрд халдсан, гүтгэсэн” гэсэн үндэслэлээр шүүхэд өгөх бололтой.

   Өмнө нь Ц.Нямдорж сайд Х.Баттулга гишүүнийг Засгийн газраас нууцаар Солонгос, Хятадын хамтарсан компанитай төмөр замын гэрээ хийсэн гэсэн мэдээллийг дэлгэсэн билээ. Түүний хийсэн энэ мэдэгдэл нь бодит байдалд нийцээгүй, нэр төр, ажил хэргийн нэр хүндийг гутаасан гүтгэлэг болсон гэж үзсэн тул УИХ-ын гишүүн Х.Баттулга нэр хүндээ сэргээлгэхээр  Хан-Уул дүүргийн шүүхэд хандсан. Тэгвэл энэ долоо хоногт “хууль засдаг” хочтой Ц.Нямдоржийг чиглэсэн хоёр дахь шүүхийн нэхэмжлэх “хуулийн ТМС” төгссөн гэж гоочлуулсан З.Энхболд гишүүнээс очих нь ээ.