Ерөнхий боловсролын 84 дүгээр сургуулийн захирлын томилгоо тойрсон асуудлаар тус сургуулийн зарим багш мэдээлэл хийлээ. 84 дүгээр сургуулийн захирлыг томилох сонгон шалгаруулах тухай албан зар гараагүй байхад Баянзүрх дүүргийн Засаг дарга тус сургуулийн захирлыг томилох шийдвэр гаргасан гэж тэд дүгнэж байна. Багш нар мэдээлэл хийх үеэр 84 дүгээр сургуулийн багш Б.Цэрэндолгор хэлэхдээ “Өнгөрсөн есдүгээр сарын 29-нд өмнөх захирал С.Мартыг тэтгэвэрт гаргах тушаал гаргаснаар ажлаас чөлөөлсөн. Манай сургуулийн багш ажилчдын зүгээс энэ албан тушаалын төлөө шударга сонгон шалгаруулалт явуулах хүсэлтэй байна.

Мөн БШУ-ны сайдын баталсан сонгон шалгаруулалтын журам сургуулийн удирдлагыг томилоход учир дутагдалтай гэж үзэж байна. Ямар учраас гэвэл, албан тушаалын үлгэрчилсэн тодорхойлолтонд 1501-ээс дээш хүүхэдтэй сургуулийн захирал наймаас доошгүй жил ажилласан, удирдах зэрэгтэй, дөрвөөс доошгүй жил удирдах албанд ажилласан туршлагатай байна гэж заасан байдаг. Гэвч сонгон шалгаруулах журамд боловсролын салбарт таван жил ажилласан байх гэдэг заалт байна” гэж хэлэв. Түүнчлэн тэд таван жил багшилж байж дөнгөж “Заах арга зүйч” мэргэжлийн зэрэг авах эрхтэй, төрийн алба хаасны нэмэгдэл авах эрх үүсч, анги дааж авах эрх үүсдэг. Захирлын орон тоонд томилох хүн олон жил ажилласан туршлагатай, удирдах зэрэгтэй байх хэрэгтэй. Тиймээс албан тушаал үлгэрчилсэн тодорхойлтын дагуу сонгон шалгаруулалтыг явуулж өгөхийг хүслээ.

Б.Жаргал