Япон улсад Азийн зуны спортын наадам амжилттай болж, харин манай улсын баг тамирчид төсөөлснөөс тун тааруу амжилт гаргалаа. Нэг алтан медаль, нэг мөнгө, 13 хүрэл медаль хүртсэн нь ойрын 20 гаруй жилд тохиогоогүй муу үр дүн гэдэгтэй үзэгч олон санал нийлэх болов уу. Манай тамирчид олимпоос олимп хүртэлх дөрвөн жилийн мөчлөгийн яг тэн хагаст ирсэн. Харин Үндэсний шигшээ багийн тамирчдын өнөөгийн амжилт шүүмжлэхээс аргагүй зүйл мөн үү гэвэл мөн. 

Тамирчдын амжилт, бэлтгэл сургуулилт бусад асуудлыг хариуцдаг ганц төрийн байгууллага нь Биеийн тамир, спортын улсын хороо юм. Энэ байгууллагыг хариуцах хүнгүй зургаан жилийг үдсэн гэвэл уншигч та гайхна. Тэр аргагүй. БТСУХ-г тохируулагч агентлаг болгосноос хойш Ц.Шаравжамц, Д.Жаргалсайхан, О.Баттулга, өдгөө Э.Билэгт нар түр орлон гүйцэтгэгчээр ажилласан ба тэд бүгд шаардлага хангаагүй төрийн албан хаагч байв. Нэг ёсондоо сонгон шалгаруулалтад тэнцээгүй, тус байгууллагыг удирдаж ирсэн.

Одоо энэ байгууллагын даргын албан тушаалд сонгон шалгаруулалт зарлахгүй бол төрийн албаны тухай хууль зөрчих үйлдэл болно. Төрийн албаны зөвлөлийн дарга энэ талаар ярилцлага өгсөн нь саяхан. Дээд байгууллагууд нь анхаарч нэг үзээсэй.  Өдгөө тус хорооны дарга Э.Билэгт нь Үндэсний шигшээ багийн хэлтсийн дарга, хавсран гүйцэтгэж байгаа бөгөөд баг тамирчдын амжилтын сайн, мууг үүрэх гол хүн нь. Тэр түр орлон гүйцэтгэгчээр ажиллаад хоёр жил орчим болж байна.

Саяхан Үндэсний шигшээ багт арын хаалгаар тамирчин оруулсан гэх асуудал нь намжаагүй. Мөн олимпын бус спортын төрөлд тамирчинг Үндэсний шигшээ багт багтаасан хэрэг нь бас хуучраагүй байна. Хариуцлага тооцох асуудлаас тэр зугтаж чадахгүй, боломжгүй, болчимгүй зүйлд хутгалдсан түүний толгойг илээд өнгөрөхгүй биз.

Монголын баг тамирчдын бэлтгэлийн цөм болсон Спортын төв ордны А заалыг МАН-ын ерөнхий нарийн бичгийн дарга Я.Содбаатарын тэргүүлдэг Монголын чөлөөт бөхийн холбоонд хариуцуулж, албан тушаалаа чангалж үлдсэн гэж салбарынхан нь хэлж, ярьж байна.  Мөн дарга болсноосоо хойш халаа сэлгээ цөөнгүй хийж, түүний шинээр ажилд авсан зарим нь ажлын байранд согтуурсан үедээ 3 давхрын цонхоор үсэрсэн асуудал нэг талдаа гараагүй удлаа. Залуу хүн ажлын арай өөр арга барилаар удирдана хэмээн найдаж, түүнийг тушаал ахиулсан л байх.

Л.Бат