Нийслэлийн БЗД-ийн 21 дүгээр хороонд 20 орчим айл өрх , гэр доторх эд хогшилтойгоо усанд автсан бие засах газар нь нэлэнхүйдээ усанд хальсан байна. Эдгээр айл өрхүүд Сэлбэ гол, Дамбын рашаан хоёрын уулзварголын сав газарт бууснаас ийм байдалд оржээ. Үерт автах эрсдэлтэй айлуудын талаар НОБГ-ын хэвлэл мэдээллийн ажилтан М.Бурмаагаас зарим зүйлийг тодрууллаа.
-Нийслэлийн хэмжээнд хэчнээн айл үерийн аюултай бүсэд байрлаж байна?
-Нийслэлийн Онцгой байдлын газар болон Өмчийн харилцааны газраас гаргасан судалгаагаар Улаанбаатар хотын нутаг дэвсгэрт нийт 2369 айл үерийн аюултай бүсэд суурьшиж байгаа. Үүнээс 467 өрх буюу 19,7% нь Сонгинохайрхан дүүрэгт, 755 өрх буюу 31,8% нь Баянзүрх дүүрэгт тус тус суурьшдаг. Эдгээр айлууд нь үерийн аюулд өртөх эрсдэл өндөр байна.
-Эдгээр айл өрхүүд газар тухайн орчимд газар эзэмших зөвшөөрөлтэй юм уу?
-65,4 хувь нь Газар эзэмших, ашиглах зөвшөөрөлгүй амьдарч байна.
Тухайлбал Баянзүрх дүүргийн 21 дүгээр хорооны 16 айл усны ундарга дээр зөвшөөрөлгүй байршны улмаас одоогоор амьдрах боломжгүй усанд автсан байдалтай байгаа юм.
-Заавал нүүлгэхгүйгээр далан барьж, үерээс хамгаалах арга хэмжээ авч болохгүй юм уу?
-Ажлын хэсэг хуралдааны шийдвэрээр үерийн хамгаалалтын далан суваг, инженерийн байгууламж хийхэд цаг хугацаа, хөрөнгө мөнгө их шаардагдах тул иргэдийн амь нас, эд хөрөнгийг хамгаалахын тулд эхний ээлжинд нүүлгэн шилжүүлэх шаардлагатай. Хотоос төлөвлөн олгож байгаа 52 байршилд энэ айлуудад газар олгох нь зүйтэй.
Мөн олон нийтэд үерийн аюултай бүсийн байршил, учруулах эрсдлийн талаар нээлттэй сурталчлах, хотын зурагт тэмдэглэх, сайтанд байршуулах, хориотой бүсийг тогтоож тэмдэгжүүлэх, шороо асгаж суурьшлын бүс болгосон газруудад нөхөн сэргээлт хийж байгалийн гольдролд оруулах арга хэмжээг авч хэрэгжүүлэхээр шийдвэрлэсэн.
Д.Ундрах /24tsag.mn/
