УИХ-ын гишүүн М.Батчимэг нарын санаачилсан Монгол хэлний тухай хуулийн төсөл батлагдаж удахгүй орон даяар хэрэгжихээр болсон. Гэвч тус хууль тусгай сургуулиудыг ивээн тэтгэх лобби явуулж байна хэмээн хэвлэлүүдээр дахин шүүмжлэх боллоо. Тодруулбал, хуулинд хүүхдүүдэд тавдугаар анги хүртэл нь гадаад хэл заахгүй хэмээн тусгаж өгсөнтэй холбоотой.

Энэ нь дэлхий даяаршиж байгаа өнөө үед Монгол улсыг дэлхийгээс таслах бодлого хэмээн хүмүүс шүүмжилж байсан. Нөгөө энэхүү заалт нь гадаад хэлний сургуулилттай сургуулиудыг шууд ивээн тэтгэсэн хэрэг болжээ. Учир нь энэ заалт ГАДААД ХЭЛ ЗААДАГ ТУСГАЙ СУРГУУЛИУДАД хамаарахгүй гэсэн. Өнөөдөр ийм ангилалд багтсан улсын сургууль байхгүй. Харин өндөр төлбөртэй хувийн сургуулиуд бол зөндөө байна.  Тиймээс энэхүү хууль нь тусгай сургуулиудыг олноор байгуулж, төлбөр нэмэх гэсэн бодлого хэмээн хардаж байна.

Харин энэ талаар хууль санаачлагчдын нэг М.Батчимэг гишүүн дараах байр суурийг илэрхийлжээ. Тэрээр “Энэ хуулиар даяаршлыг эсэргүүцэх, гадаад хэлийг хязгаарлах зорилго огт тавиагүй бөгөөд улам бүр эрчимжиж байгаа англи хэл, латин үсгийн түрэлт, гадны соёлын нөлөөн дунд үндэсний бичиг үсгээ хадгалж, хөгжүүлэхийг эрмэлзсэн болно. Гадаад хэлний сургалттай холбоотой хоёр гол агуулга хуульд туссан. Нэгд, гадаад хэлээр сургалт явуулдаг хувийн сургуулиудад монгол хүүхдэд монгол хэл, уран зохиол, монгол бичгийн хичээлийг нэгдүгээр ангиас төгсөх хүртэл батлагдсан хөтөлбөрөөр заахаар хуульчилсан. Хоёрт, төрөөс бүх нийтэд үнэ төлбөргүй боловсрол олгодог ЕБС-иудад гадаад хэлийг тавдугаар ангиас эхлэн заахаар тусгасан. Төрөөс үнэгүй олгодог албан сургалтаараа хүүхдэд эхлээд төрөлх хэлээ сайн сурсны дараа 10-11 наснаас гадаад хэл заах бодлогыг дэлхийн олон оронд баримталдаг. Жишээ татахад, Япон улс хүүхдэд 11 наснаас гадаад хэл заах бодлоготой бөгөөд “Япон хүнийг бага ангийн багш бий болгодог, түүнд шаардлагатай мэдлэгийг дунд ангиас олгодог” гэсэн ойлголт түгээмэл байдаг байна. Монгол Улс 1990 оноос өмнө хүүхдэд 4 дүгээр ангиас буюу 11 наснаас гадаад хэлийг зааж ирсэн бодлого өнөөг хүртэл олон арван жил үргэлжилж байна. Өнөөдөр хүүхэд 6 настай ЕБС-д орж, 5 дугаар ангиас буюу 10-11 наснаас гадаад хэл үзэж байна” гэсэн байна.

Гэсэн хэдий ч аливаа хувийн сургуульд сурагчдын тоон нэмэгдэхийн хэрээр орлого нь ч өснө. Үүнийгээ дагаад тухай сургууль төлбөрөө нэмдэг практик бий. Тэгэхээр хууль хэнд ашигтай бизнес авчирч буй нь ойлгомжтой байгаа юм.
Цашилбал тусгай сургууль болон улсын сургуульд сурсан хүүхдүүдийн мэдлэг тэнгэр газар шиг зөрүүтэй болно. Тавдугаар ангиас өмнө хэл заалгаагүй хүүхэд дэлхий нийтээс хоцорсон нэгэн болох юм.