Өнөөдөр үдээс хойш 15.00 цагийн орчимд Төрийн ордонд гал гарсан. Уг асуудлаар Ерөнхий сайдын зөвлөх Ц.Мөнхтөр хэвлэлийнхэнд мэдээлэл өглөө.

Тэрбээр "Төрийн ордны баруун урд зүгт гал гарсан. Энэ хэсэг нь Засгийн газрын хуралдааныг явуулдаг танхим юм. Галыг одоогийн байдлаар бүрэн унтраагаад байна. Гал гарсан шалтгааныг тогтоохоор мэргэжлийн байгууллагууд ажиллаж байна. Засгийн газрын хуралдаан 16.00 цагт эхлэх ёстой байсан. Гэхдээ ажил саатаагүй бөгөөд одоо Нутгийн удирдлагын танхимд хуралдаан болно. Ерөнхий сайд өнөөдөр Арабын нэгдсэн Эмират улсад ажлын айлчлал хийж байгаа учраас Шадар сайд У.Хүрэлсүх Засгийн газрын хуралдааныг ахлан явуулна. Өнөөдрийн хуралдаанаар 30 гаруй асуудлыг хэлэлцэнэ. Төрийн ордонд гал гарна гэдэг бол ойлгоход хэцүү асуудал. Уг асуудлыг шалгаж хариуг ойрын үед гаргах байх. Засгийн газрын хуралдааны танхим нилээн шатсан байна. Гэхдээ цаашаа гүн орсон зүйл алга" гэлээ.

Ажилчдыг Төрийн ордон руу оруулахгүй байсаар  байна. Гал гарах үед Засгийн газрын хуралдаанд бэлтгэж байсан ажилчид байсан ч гэмтэж бэртээгүй аж.

Т.Хулан