Т.Цогт, Г.Маралмаа нарыг шүүх хурал Дүүргийн эрүүгийн хэргийн анхан шатны нэгдүгээр шүүхэд эхэлсэн ч эцсийн шийдвэр мөн л гарсангүй. Шүүх хурлыг зургадугаар сарын 3-ны өдөр хүртэл хойшлуулахаар болжээ. Учир нь услын яллагч шүүх хуралд оролцох боломжгүй болсноо мэдэгдсэн байна. Түүнчлэн энэ оны хоёрдугаар сард хэрэг гарах үед Г.Маралмаа жирэмсэн байсан төдийгүй одоо 6-7 орчим сартай, том гэдэстэй болсон байна. Тиймээс тэрбээр жирэмсний хяналтад орохыг хүсчээ.

Шүүх хуралд “Ээж бүхний дуу хоолой” ТББ-ынхан болон талийгч охины ээж оролцохоор иржээ. Талийгаачийн ээж сэтгэл санаа маш хүнд байгаа учир хэвлэлийнхэнд яриа өгөхөө цааргалав.

Харин “Ээж бүхний дуу хоолой” ТББ-ын гүйцэтгэх захирал Б.Уянгаас зарим зүйлийг тодрууллаа.

-Шүүх хурал хойшилчихлоо. Та бүхэн энэ хэргийг хэрхэн шийдэгдээсэй гэж хүсч байна вэ?
-Улсын яллагч нь сургалтад суугаад шүүх бүрэлдэхүүн бүрэн бүрэлдэхүүнээрээ хуралдах боломжгүй байсан учраас өнөөдрийн шүүх хурал хойшлогдлоо. Ирэх зургаадугаар сарын 3-нд гэсэн тов тавигдлаа. Г.Маралмаа болон Т.Цогтын өмгөөлөгчид шүүх хурлыг хаалттай явуулах хүсэлт тавьсан боловч шүүгч нар уг асуудлыг хэрэгсэхгүй, нээлттэй хийхээр боллоо. Г.Маралмаа нэлээд том гэдэстэй жирэмсэн юм байна. Эмчийн хяналтанд байх хүсэлт тавьсан. Адилхан эмэгтэй хүний хувьд харахад хэцүү  л байлаа. Өөрөө жирэмсэн байсан байж хүний нялх үрийг зодож байсан гэж бодохоор хүнд байна. Хэрэг үнэн зөв шийдэгдэнэ гэж найдаж байна. Тэр жаахан охины алтан амь гэр бүлийн хүчирхийлэл, монголын хүүхэд хамгааллын байдал ямар байгааг харууллаа. Хүн бүхэн өөрсдөөсөө өөрчлөлтийг эхэлж, үр хүүхдээ хайрлаж амар амгалан байгаасай л гэж хэлье. Амиа алдсан охины ээж ирсэн. Гэвч та бүхэнд яриа өгөх боломжгүй байна.

Д.Ундрах /24tsag.mn/