Лере Мгаяияа Өмнөд Африкийн Иоханесбург хотод оршин суудаг бөгөөд Өмнөд Африкийн гутал өнгөлөгч хамгийн том компани “Лерегийн гутал өнгөлгөө” компанийн эзэн юм.

Тэрбээр анх Өмнөд Африкийн нисэх компанид онгоцны тасалбар түгээгчээр 5 жилийн турш ажиллаж байгаад цомхотголд орж халагдсан байна.

Ажилгүй болсон Лере гэр бүлээ тэжээхийн тулд маш олон ажил хийж байсан ч удалгүй халагдаж, амжилт олохгүй хэдэн жил болжээ.
 

Лере энэ тухайгаа ийнхүү өгүүлжээ. Би амрах завгүй хэд хэдэн ажил хийж байлаа, үнэндээ надад гэр бүлээ тэжээхийн тулд амрах эрх байгаагүй юм. Би өндөг зарж үзсэн, хайрцаг бүрээс 6 долларын ашиг олдог байсан ч энэ бизнес маань дампуурсан. Дараагаар нь би бизнес эрхлэгчдийн телевизийн тэмцээнд орж 3,100 доллар хожиж түүнийгээ мод тарьдаг бизнест хөрөнгө оруулсан боловч энэ бизнес маань бас дампуурч 6 сарын дараа ямар ч мөнгөгүй болсон юм.

Надад тогтвортой орлого хэрэгтэй байлаа. Иймд би Кэйф тауны нисэх буудалд гутал өнгөлөх бизнес эрхлэхээр шийдсэн юм. Учир нь тэнд маш олон хүн ирдэг бөгөөд нисэх цагаа хүлээн дэмий сэлгүүцэж явдаг.

Ингээд би, бизнес эрхлэх багахан талбайн зөвшөөрөл авахын тулд 2002 оны 11 сард өргөдөл өгсөн боловч нисэх буудлын угтагч шиг хэдэн сар эрх бүхий хүмүүсийг хүлээж зогссоны эцэст 2003 оны 9 сард зөвшөөрөл авч чадсан юм. Үүний дараа бизнесээ эрхлэх хэрэгсэл авахын тулд гэрт байсан хөргөгчөө барьцаанд тавьсан. Гэвч эхний өдөр манай ажилтан муу мэдээтэй ирсэн нь захиалсан хөлийн гишгүүр маань ирээгүй байв.

“Ингээд би өвдөг дээрээ үйлчлүүлэгчийнхээ гутлыг тавиад гялалзтал өнгөлж байлаа.”

Тэр үед би гэрээсээ өглөө 5 цагт гарч орой 9 цагт бяцхан охиноо унтсаны хойно очдог байсан. Надад гутал тослох ямар ч туршлага байхгүй байсан учир хааяа үйлчлүүлэгчийн оймсонд гутлын тос нялах зэрэг алдааг гаргаж үйлчлүүлэгчдийн дургүйг хүргэдэг байсан ч би алдаагаа давтахгүй байх тал дээр үргэлж хичээдэг байсан.

Цөхрөлтгүй ажилсны эцэст үйлчлүүлэгчид маань бидний үйлчилгээнд сэтгэл хангалуун байсан учир 4 сарын дараа “Нисэх буудлын гутал өнгөлгөө” маань “Лерегийн гутал өнгөлгөө” болж 5 ажилтантай болж бизнес маань дэвжиж байсан юм.

Кэйф таунд олсон энэ амжилт надад илүү том зорилтыг төрүүлсэн нь Өмнөд африкийн нисэх буудлуудад буй бүх гутлыг өнгөлөх санаа байсан юм.
Удалгүй би зорилгоо биелүүлж Кэйф таун, Иохансбург, Дурбан зэрэг хотуудад орших 5 нисэх буудалд 60 ажилтантай компанийг бий болгож чадсан юм.
Өнөөдөр “Лерегийн гутал өнгөлгөө” компани Өмнөд Африк даяар өдөрт 600 гаруй хос гутал өнгөлж, жилдээ 2,5сая ранд буюу 227,000 долларын ашигтай ажилладаг.

Магадгүй та өмнөд Африкт хөл тавьж гутлаа өнгөлүүлэх шаардлага гарвал “Лерегийн гутал өнгөлгөө”-ны ажилчид таныг арьсан буйдан дээр суулгаж гутлыг тань шинэ мэт гялалзтал өнгөлнө гэдэгт итгэлтэй байж болно.
Түүнчлэн Лере өөрийн бизнесээ өргөжүүлж хөрш Нигер, Ангол, Кени зэрэг орнуудад салбараа нээхээр Америк, Английн түншүүдтэйгээ хэлэлцэж байгаа ажээ.