Австралийн уул уурхайн гүйцэтгэгч компани “Макмахон Холдинг” Монголын засгийн газартай маргаанаа хууль ёсоор шийдвэрлүүлэх боллоо хэмээн Австралийн хэвлэлүүд мэдээлж эхэллээ. Тодруулбал, Эрдэнэс Тавантолгойн Зүүн цанхид олборлолт явуулж буй “Макмахон Холдинг”-ийн охин компани Монголоос 100 сая ам.доллар гаргуулахаар болсноо олон улсад зарлаад байна.

Эрдэнэс Тавантолгой нь “Макмахон Холдинг”-д төлөх ёстой 30 сая ам.доллараа төлөөгүй нь хоёр талыг үйл ойлголцоход хүргэсэн билээ.

“Макмахон Холдинг” эцсийн байдлаар найдваргүй авлагыг хасаад 30 сая ам.долларын нэхэмжлэлийг Эрдэнэс Тавантолгойд хүргүүлээд байсан юм.  Гэвч өнгөрсөн жил эхэлсэн маргаан шийдэгдэхгүй өдийг хүрснээр 30 сая ам.долларын нэхэмжлэл 2015 онд гэхэд алдагдал өссөөр 100 сая ам.долларт хүрчээ.

Харин өчигдөр “Макмахон Холдинг” Монголын төрийн өмчит компанитай үүсгэсэн маргаан бидний талд шийдвэрлэгдлээ хэмээн зарлалаа. Харин энэ талаар Эрдэнэс Тавантолгой компани ямар нэгэн мэдээлэл хийгээгүй байгаа юм.

"Макмахон Холдинг" маргааныг өөрийн талд шийдвэрлүүлснээр бусад олон асуудал нь нааштайгаар эргэнэ хэмээн бичжээ. Учир нь тус компани өнгөрсөн хоёрдугаар сард "Fortescue Metals"-ийн төмрийн хүдрийн олборлолтын ажлаас ихээхэн алдагдалд орсон бөгөөд өнгөрсөн тавдугаар сард Шинэ Зеланд дахь "Waihi" алтны уурхайн ажлаа зогсоогоод байсан юм. Ингэснээр "Макмахон Холдинг"-ийн "BHP Billiton"-ий "Олимпийн далан" уурхайн ажил сулрахад хүрээд байжээ.

"Макмахон Холдинг" өнгөрсөн жилийн эцэс гэхэд бэлнээр 124 сая, нийтдээ 161 сая ам.долларын өрөнд ороод байсан гэжээ. Тиймээс Монголын маргаан нааштайгаар шийдэгдсэн нь "Макмахон Холдинг"-т зээлдүүлэгчидтэйгээ шийдэлд хүрэх боломж гарах юм гэж дүгнэсэн байна.

Энэ бол Монгол Улс гэрээ хийсэн олон улсын уул уурхайн компанитай маргалдаж, түүндээ ялагдал хүлээж буй анхны тохиолдол биш.  Хамгийн сүүлд л гэхэд өнгөрсөн гуравдугаар сард Канадын "Хан Ресурс" компани Арбитрын шүүхэд ялалт байгуулж Монголын засгийн газраас 100 сая доллар гаргуулахаар болсон бөгөөд шүүхийн шийдвэр гарснаас хойш өдрөөс өдөрт долларын хүү бодогдон нэмэгдсээр байна. Мөн "Рио Тинто" компани ч энэхүү хэргийн дараа Оюутолгойн гүний уурхайн төслийг гацаанаас гаргахгүй бол Арбитрын шүүхэд хандана хэмээн мэдээлээд байсан билээ.

Д.Идэр

www.24tsag.mn