Оросын довтолгоо эрчимжсэнтэй холбоотойгоор Киевийн нэгэн сургууль хичээлээ шууд хонгилд явуулахаар болжээ. Украинд есдүгээр сарын 1-нд хичээлийн шинэ жил эхэлсэн ч олон хүүхдийн хувьд энэ өдөр өмнөх жилүүдийнх шиг энгийн байсангүй. ОХУ-ын агаарын довтолгоо эрчимжиж буй энэ үед Киевийн нэгэн сургууль сурагчдаа аюулгүй байлгахын тулд хичээлээ газар доорх хоргодох байранд зохион байгуулж эхэлжээ.
Киев хотын "Ukrainian Global School"-д шинэ хичээлийн жилийн эхний өдөр ирсэн хүүхдүүд шууд сургуулийн хонгил руу орсон байна. Сүүлийн хэдэн өдөр нийслэлд Оросын агаарын довтолгоо бараг тасралтгүй үргэлжилж байгаа учраас агаарын довтолгооны дохио дуугарах бүрд хүүхдүүдийг ангиас хоргодох байр руу шилжүүлэх нь хүндрэлтэй болсон аж.
Тиймээс тус сургууль сурагчдыг дохио дуугарах үед хоргодох байр руу гүйж орох шаардлагагүй болгохын тулд хичээлийг эхнээс нь газар доорх аюулгүй орчинд явуулах шийдвэр гаргажээ.
Сургуулийн удирдлага эцэг эхчүүдэд илгээсэн захидалдаа энэ шийдвэр нь сургалтын үйл явцыг тасалдуулахгүй байх зорилготойг тайлбарласан байна. Хүүхдүүд аль хэдийн аюулгүй газар байгаа тул агаарын довтолгооны дохио дуугарсан үед хичээлээ зогсоож, дахин ангидаа орохыг хүлээх шаардлагагүй болжээ.
Украинд есдүгээр сарын 1-нийг Мэдлэгийн өдөр хэмээн тэмдэглэдэг уламжлалтай. Гэвч Оросын дайн эхэлснээс хойш тус улсын хүүхдүүдийн хичээл сургуульд явах нөхцөл эрс өөрчлөгдсөн. Фронтын шугамд ойрхон бүсүүдэд зарим хүүхэд цахимаар хичээллэхээс өөр аргагүй хэвээр байгаа бол бусад газарт сургуулиуд аюулгүй байдлын шаардлагад нийцүүлэн газар доорх хоргодох байр ашиглаж байна.
Ийнхүү Украины хүүхдүүдийн хувьд хичээлийн шинэ жилийн эхний өдөр баяр хөөр, шинэ эхлэлээс гадна дайны үеийн аюулгүй байдлын сорилтыг даван туулах өдөр болон өнгөрч байна.
Л.Баяр
