Сүүлийн өдрүүдэд цахим сүлжээнд нэгэн Монгол иргэн хамт ажиллаж байсан хоёр хүн нь Балбад болсон гамшигт өртөн сураггүй болсон талаар цахим сүлжээндээ мэдээлсэн. Хэвлэлүүд уг иргэдийг монгол хүмүүс байсан талаар мэдээлсэн. Гэвч энэ тухайд Гадаад харилцааны яамнаас мэдээлэл хийжээ.

       Энэ талаар Гадаад харилцааны яамны Хэвлэлийн төлөөлөгч Р.Нямдаваа "БНХАУ-ын Төвөдийн Өөртөө Засаx Орон болон Балба Улсын нутагт гарсан байгалийн гамшигт Монгол Улсын хоёр иргэн өртсөн гэх мэдээлэл нийгмийн сүлжээнд түгээд байна.

Хилийн чанадад ажиллаж, амьдардаг Монгол Улсын иргэн өөрийн хамт ажилладаг байсан гадаад улсын иргэд байгалийн гамшигт өртсөн талаар нийгмийн сүлжээнд нийтэлсэн нь Монгол Улсын олон нийтийн дунд ташаа мэдээлэл түгээхэд хүргэжээ.

Гадаад харилцааны яам байгалын гамшигт үзэгдэл гарсан цагаас хойш Монгол Улсаас БНХАУ-д суугаа Элчин сайдын яам болон Энэтхэг Улсад суугаа Элчин сайд яам (Балба Улсыг хавсран хариуцдаг)-аар дамжуулан суугаа улсуудын холбогдох байгууллагуудтай тогтмол холбоотой ажиллаж байгаа бөгөөд одоогоор Монгол Улсын иргэд байгалын гамшигт үзэгдэлд ямар нэг байдлаар өртсөн гэх мэдээлэл ирээгүй байгаа болно" хэмээлээ. 

Л.Баяр