Хятадын эрх баригчид их хэмжээний стандартын бус махыг хүнсэнд ашиглаж байсныг илчилсэн талаар “Сяньхуа” агентлаг мэдээллээ. Нууцаар худалдаж байсан 800 тонн хөлдөөсөн махны дунд 1970 оны мах байсныг барууны хэвлэлүүд онцолж байна.

Төрийн өмчит “Сяньхуа” агентлагийн мэдээлснээр махыг Хунан аймгаас илрүүлсэн бөгөөд хууль бус худалдаачид тус аймгийн ресторан, жижиглэнгийн дэлгүүр болон супермаркетуудад зардаг байжээ.

Шувуу, үхрийн махыг энэ сарын нэгний өдөр хураан авсан бөгөөд 10 сая юань буюу ойролцоогоор 1.6 сая ам.долларын үнэ бүхий мах байсан хэмээн “China Daily” мэдээлсэн байна.

Хамгийн ноцтой нь зарим боодолтой махнууд ялзарсан байсан бол зарим нь 45 жилийн турш хадгалсан мах байжээ. Тодруулбал, худалдах гэж байсан махны дунд Хятадын соёлын хувьсгалын тамгаар тамгалагдсан боодолтой махнууд байсан байна.

Хураан авах ажиллагаанд оролцсон орон нутгийн албаныхны мэдээлснээр махыг тусгай тасалгаанд хадгалж байсан бөгөөд хаалгыг нь онгойлгох үед асар өмхий үнэр үнэртэж байжээ.

Хүнсний аюулгүй байдлыг хангах ажилагааг Хятадын эрх баригчид эрчимтэй эхлүүлж байна. Үүнээс өмнөхөн 14 аймагт 500 сая долларын үнэ хүрэх 100 тонн хууль бус махыг хураан авч, 21 хүнийг баривчилсан юм.

Удаан хугацаанд хадгалсан стандартын бус мах нь аюултай өвчин үүсгэх вирус агуулж байдаг.

Махаа борлуулахын тулд хууль бус худалдаачид сайтар гэсгээх зуур үнэрийг нь дарж, хөргөгчтэй машин биш энгийн машин хөлсөлдөг байжээ. Ингэснээр үйлчлүүлэгчид шинэ мах хэмээн итгэдэг байсан гэнэ.

Худалдаачид стандартын бус махыг Хонконг, Вьетнамаас асар хямд үнээр худалдан авдаг хэмээн мэдүүлсэн байна.

Г.Үжин