“Хөгжил-Ардчилал” ТББ-гаас цуврал болгон зохион байгуулж байгаа нээлттэй хэлэлцүүлгийн 2015 оны 5-р сарын 24-ны өдрийн зочноор “Жавзандамба Хутагт Төв”- ийн багш, гавж Д. Нямсамбуу оролцож “Хөгжил ба ёс суртахуун” сэдвийн дор чөлөөт ярилцлага өрнүүллээ. Тэрээр хэлэхдээ „Бурханы шашин Монголд зайлшгүй шаардлагатай. Гэхдээ бүх хүмүүсийг бурхны шашинтай болгох сонирхлыг агуулаагүй.  Манай өнөөгийн нийгэмд хамгийн их дутагдаж байгаа зүйл бол жудаг, хүний мөс. Нийгмийн аливаа сөрөг үзэгдэл хувь хүний ёс суртахуунтай холбоотой байдаг. Өөрөөр хэлбэл улс үндэстний хөгжлийн анхны үүд бол зөв ёс суртахуунтай хувь хүн юм. Ёс суртахуун тэгвэл нийгэмд тэгш тархсан байх ёстой гэдгийг гавж Д. Нямсамбуу ярилцлагынхаа эхэнд онцолж байлаа. Мөн Монголчууд бидэнд хүлээцтэй, бие биенээ хүндэтгэсэн байдал ихээр дутагдаж байгаа. Нийгмийг бүхэлд нь хамарсан энэ ёс суртахууны доройтол хууль, журмаар зохицуулагдах боломжгүй. Гагцхүү хувь хүний муу юмыг хийж дадаагүй эрхэмсэг ухамсар үүнийг зохицуулж чадна. Энэ ухамсар нь хувь хүнд бат суурьшсан байх ёстой. Ёс суртахуун үрийг нийгэмд тарихад хөрөнгө оруулaлт шиг шууд ашгаа өгдөг зүйл биш, харин удаан хугацаанд үр дүнгээ өгдөг процесс. Ёс суртахуун дээр суурилсан нийгэм бий болж байж улс үндэс хөгжлийн үндсийг бий болгож чадна. Ихэнх улс үндэстэн гадны гэхээсээ илүү дотоод нөхцөл байдлаас болж задардаг байдаг. Манай өнөөгийн нийгэмд ёс суртахууныг бий болгох нэг боломж бол бурхны шашин. Учир нь манай иргэдийн 87 хувь нь буддизмийг хүндэлдэг, өөрөөр хэлбэл бурхны шашин манай нийгмийн талаас дээр хувьд нь шууд хүрч очиж чадна. Эх оронч үзлийн гайхамшиг бол ганцхан өөрийгөө бодох биш харин бусад олон хүмүүсээ бодох сэтгэлийг хэлнэ гэдгийг ч хэлж  байсан юм.