Монгол Улсын Их Хурлын дарга З.Энхболд өчигдөр /2015.07.04/ “ЭХБУТрест” ХХК-ийн барилгын материалын үйлдвэрүүдийн үйл ажиллагаатай танилцав.
УИХ-ын даргыг компанийн удирдлагууд угтан авч, Полиуретан дулаалгатай сэндвич хавтангийн үйлдвэр болон Төмөр хийцийн үйлдвэр, Нугалмал хөнгөн ган араг хийцийн үйлдвэрүүдийн үйлдвэрлэлийн явц, шат дамжлагыг танилцуулсан юм. Тус компани 888 төслийн хүрээнд 2014 оны 11 дүгээр сард Чингис бондын хөрөнгөөс 5 жилийн хугацаатай зээл авчээ. Жилийн 9 хувийн хүүтэй 3.6 тэрбум төгрөгийн зээлийн хөрөнгө дээрээ компанийн ашгийн хуримтлал, санхүүгийн бусад эх үүсвэрүүдийн хөрөнгө оруулалтыг нэмж нийт 8 сая ам.долларын өртөг бүхий 3 үйлдвэрийг ашиглалтад оруулаад байгаа аж.
Төмөр хийцийн үйлдвэр нь бүрэн автомат шугам бүхий Японы Daito , БНСУ-ын Maiko компанийн Q235, Q345 маркын гангаар иргэний болон үйлдвэрийн зориулалтаар ашиглагдах даацын болон даацын бус бүх төрлийн төмөр хийцийг стандартын дагуу үйлдвэрлэдэг байна. Тус үйлдвэр жилд 10.000 тонн төмөр хийцийг захиалагчдын хүсэлтийн дагуу инженерийн зураг, тооцооллоор шугамын компьютерийн программ хангамжийн тусламжтайгаар үйлдвэрлэх хүчин чадалтай болохыг “ЭХБУТрест” компанийн ерөнхий захирал С.Сүхтөмөр УИХ-ын даргад танилцуулав.
Мөн БНСУ-ын К Industrial компанийн автомат шугам бүхий Полиуретан дулаалгатай сэндвич хавтангийн үйлдвэр нь өдөрт 3300 м.кв, жилдээ 1.000.000 м.кв полиуретан дулаалгатай сэндвич хавтан үйлдвэрлэх хүчин чадалтай юм байна.
Тус үйлдвэрийн дулаалгын материалаар угсармал орон сууцыг дулаалахад нэн тохиромжтой бөгөөд туршилт амжилттай болсон талаар УИХ-ын даргад тус компанийн тэргүүн дэд захирал С.Жаргалсайхан танилцуулав. 4 орцтой 60 айлын угсармал орон сууцыг дулаалахад 800 орчим сая төгрөгийн өртөгтэй болжээ. Дулаалгын туршилт хийхдээ оршин суугчидтай тохиролцон орон сууцны дээр дахин 1 давхар нэмж, тэдгээрийг худалдаалж олсон орлогоор зардлаа нөхөх зарчмаар гүйцэтгэсэн байна. Дулаалгын явц 1 сар үргэлжилсэн байна. Улаанбаатар хотын нийт угсармал барилгуудыг дээрх технологиор дулаалах юм бол дулаан алдагдлыг тодорхой хувиар бууруулж, эдийн засгийн хувьд өндөр үр ашигтай болохыг мөн тэрээр дуулгасан юм.
Полиуретан дулаалгатай сэндвич хавтангийн үйлдвэр, Төмөр хийцийн үйлдвэр, Нугалмал хөнгөн ган араг хийцийн үйлдвэрийн бүтээгдэхүүнүүд ижил төрлийн импортын барилгын материалуудаас 20 орчим хувийн хямд байдаг байна. Барилгын томоохон компаниуд тус үйлдвэрүүдийн бүтээгдэхүүнийг худалдан авдаг ч борлуулалтын тал дээр төр засгаас бодлогын түвшинд дэмжих шаардлага байгаа хэмээн үйлдвэрийн удирдлагаууд УИХ-ын даргад танилцуулав.
УИХ-ын дарга З.Энхболд Нугалмал хөнгөн ган араг хийцийн үйлдвэртэй өмнө нь танилцаж байсан бөгөөд тухайн үед иргэдэд зориулсан хямд өртөг бүхий амины орон сууц хийх зөвлөмж өгч байжээ. Өнөөдөр “ЭХБУТрест” компанийн удирдлагууд УИХ-ын даргын зөвлөмжийг ажил хэрэг болгон, тус компанийн мэргэжилтнүүдийн зураг, төлөвлөгөөний дагуу уг үйлдвэрт үйлдвэрлэсэн төмөр хийцээр хямд өртөг бүхий байшин барьж байгаа талаараа танилцууллаа.
Үйлдвэрүүдийн үйл ажиллагаатай танилцсаны дараа УИХ-ын дарга З.Энхболд аж үйлдвэрийн салбарыг дэмжих чиглэлээр УИХ-аар хэлэлцэгдэж буй хууль, тогтоолуудын төслийн талаар мэдээлэл өгөв. Мөн үйлдвэрийн удирдлагууд, мэргэжилтнүүдтэй барилгын материалын зах зээлийн талаар болон барилгын компаниудын үйл ажиллагааг төрөөс хэрхэн дэмжих талаар харилцан ярилцаж, санал солилцсон юм.
УИХ-ын даргыг барилгын үйлдвэрүүдтэй танилцах үеэр УИХ-ын гишүүн Б.Гарамгайбаатар болон албаны бусад хүмүүс байлцав хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
