Нийслэлийн “Даншиг” наадмын үеэр буюу өнгөрсөн амралтын өдрүүдэд нийслэлийн хэмжээнд нийт 550 дуудлага, мэдээлэл ЗЦГ-т иржээ. Үүнээс осол хэргийн шинжтэй 392 дуудлага хүлээн авч, хүн гэмтсэн 19 осол гарч, ослын улмаас 29 хүн гэмтсэн байна. Мөн эд материалын хохиролтой зам тээврийн осол 23 гарсан бол орон нутагт ослоор 2 хүн нас барсан байна.

Тухайлбал, бямба гарагт Дорноговь аймгийн Эрдэнэ сум Сайншандаас хойш 54км засмал замд Toyota Prius автомашины жолооч “Т” нь онхолдож, жолооч 35 настай эмэгтэй “Т” амиа алджээ. Мөн энэхүү өдөр Хөвсгөл аймгийн Их-Уул сумын Асгат багийн нутаг Жаргалант гэх газар шороон замд улсын дугааргүй Тундра Мустанг мотоциклын жолооч “Б” нь улсын дугааргүй Мустанг маркын “Ч” жолоочтой мотоциклтой мөргөлдөж, жолооч 34 настай эрэгтэй “Ч” амиа алдсан хэргийг шалгаж байгаа аж. Дээрх өдрүүдэд замын цагдаагийн алба хаагчид согтууруулах ундааны зүйл уусан үедээ тээврийн хэрэгсэл жолоодсон 207 жолоочийг илрүүлжээ.

Согтууруулах ундааны зүйл уусан үедээ тээврийн хэрэгсэл жолоодож зам тээврийн осол гаргасан жолооч 4, согтуугаар хөдөлгөөнд оролцож гэмтсэн явган зорчигч 4 байна. Мөн хүүхэд өртсөн осол 4 гарсны 2 нь сургуулийн өмнөх насны, 2 нь сургуулийн насны хүүхэд байсан ба 2 нь зорчигч, 2 нь явган зорчигч хүүхдүүд байсан байна. Иймд хүн бүр Монгол улсын замын хөдөлгөөний дүрмийг биелүүлж, архи согтууруулах ундааны зүйл хэрэглэсэн бол тээврийн хэрэгсэл жолоодохгүй байх, архинаас үүдэн гарах хор хохирлыг гүнээ ухамсарлах, хурд хэтрүүлэхгүй байх, хамгаалах бүсээ зүүж, замын хөдөлгөөний аюулгүй байдлыг хангаж хөдөлгөөнд оролцох нь жолооч төдийгүй хүн бүрийн чухал үүрэг болоод байна.

Д.Ундрах /24tsag.mn/