Үндэсний их баяр наадмын үеэр буюу өнгөрсөн сарын 14-нд “Үндэсний соёл амралтын хүрээлэнд ажилладаг 19 настай охин ажлаасаа эргэж ирээгүй тул харсан хүн холбоо барина уу” гэх мэдээлэл, охины зурагтай хамт цахим сүлжээгээр нийтлэгдэж байсан. Тэгвэл охиныг алга болсоноос дөрөв хоногийн дараа буюу өнгөрсөн сарын 17-ны өдөр галт тэргэнд дайруулан амиа алдсан байдалтайгаар цогцсыг нь моргоос олсон юм. Гэвч ар гэрийнхэн нь охиноо амиа хорлосон бус гадны нөлөөтэй нас барсан гэж үзэн хуулийн байгууллагаар шалгуулж байна.

Цагдаагийн байгууллагаас  галт тэрэгний жолоочид эрүүгийн хэрэг үүсгэн шалгаж байна. 

Хэдийгээр галт тэрэгний урдуур гэнэт орж ирсэн гэж байгаа ч галт тэрэгний жолооч зогсох боломжтой байсан үгүйг шинжээчид шалгаж тогтоох юм байна. 

Мөн талийгаач охины хэрэгт хамгийн сүүлд суусан таксины жолоочийг эрэн сурвалжилж байгаа юм.

Охин хамгийн сүүлд хар бараан өнгийн королла эксио юм уу аллион маркийн машинд суусан гэж гэрчүүд мэдүүлжээ. Тиймээс цагдаагийн байгууллага Авто тээврийн үндэсний төвийн өгсөн судалгааны дагуу энэ төрлийн 262 машинд хяналт шалгалтыг явуулж байгаа аж. 

Д.Ундрах /24tsag.mn/