Монголчууд гурилан бүтээгдэхүүний хомсдолд орж магадгүй болжээ. Учир нь энэ жил ургац алдаж, буудайн үнэ нэмэгдэх сургаар гурлын үнэ нэмэгдэж, өдгөө хомсдол бий болсон байна.
Хүнс хөдөө аж ахуйн яамнаас ирэх аравдугаар сарыг дуустал гурил, будааны нөөц хангалттай байгаа хэмээн мэдэгдэж байсан билээ. Гэтэл гурил үйлдвэрлэгчид “Буудай байхгүй, агуулахад гурил дуусчихсан болохоор гурил зарахгүй, гэрээт борлуулагч нарынхаа захиалгыг дийлэхгүй байна” гэх тайлбарыг хийж, гурилан бүтээгдэхүүн үйлдвэрлэгч нарт түүхий эд нийлүүлэхгүй байгаа аж.
Тиймээс өдгөө гурилан бүтээгдэхүүний дотоодын зах зээлийн ихэнх хувийг хангадаг “Талх чихэр”, “Атар-Өргөө” компаниуд түүхий эдийн 10 хүрэхгүй хоногийн нөөцтэй үйл ажиллагаагаа явуулж байгаа юм байна.
Үйлдвэрлэгч нар түүхий эдгүй болохоор ард түмэн талхгүй болох нь ойлгомжтой. Хэдхэн хоногийн өмнө 100 төгрөгөөр нэмэгдсэн талх маргааш дэлгүүрийн лангуун дээрх байхгүй, эсвэл 500 төгрөгөөр нэмэгдчихсэн байхыг хэн ч үгүйсгэхгүй болоод байгаа юм.
Энэ жил ургац алдах, алдахгүйн тухай яриаг хэтэрхий улс төржүүлснээс ийнхүү гурлын үнэ нэмэгдэж, эцэст нь гурилан бүтээгдэхүүний хомсдолд орохоор болоод байгаа нь үнэхээр харамсалтай. Тариалан эрхлэгчдийн холбоо, салбарын яамны хэрүүл эцэст нь ард түмний нуруун дээр ачаа үүрүүлж, хоногийн талхыг нь таслах дээрээ тулав.
Салбарын яамнаас квот тогтоож, гурил импортлохыг хязгаарлачихсан нь гурил үйлдвэрлэгч нарт хэтэрхий монопол эрхийг олгосон гэдгийг ч гурилан бүтээгдэхүүн үйлдвэрлэгч нар өгүүлж байгаа юм. Түүнчлэн гурилын хомсдол үүсэх сургаар ченж нар их хэмжээгээр нөөцлөж, дамлаж зарахаар ийнхүү гурлын хомсдол үүсгэсэн гэдгийг ч учир мэдэх хүмүүс өгүүлсэн.
Уг нь гурил, будааны нөөц үндэсний аюулгүй байдлын хэмжээний асуудал баймаарсан. Гэтэл ургац, алдах алдахгүй байх тухай яриаг олонд дэлгэж, дуулиан дэгдээж, гурлын үнэ нэмэгдэж, хомсдол үүсгэх болсон хариуцлагыг ард түмэн үүрэх болж байгаад холбогдох албаны хүмүүс анхаарал хандуулах хэрэгтэй байгааг энд дахин өгүүлье.
Сэтгэгдэл (5)