"Хүннү лорд" гэх компани Засгийн газрын нэрийг барьж 160 ам.долларын үнэтэй сурталчилгааны сэтгүүлийг гадаадаас ирсэн жуулчдад хүчээр шахаж байсан талаарх баримтыг Ерөнхий сайд Ч.Сайханбилэг олон нийтэд дэлгэсэн. Цаашилбал  "Уг сэтгүүлийг  худалдаж авахгүй бол Монгол руу оруулахгүй" гэх шахалтыг жуулчдад үзүүлж байсан гэдэг.

Энэхүү сэтгүүлийг хил гаалын онцгой бүсэд зарах зөвшөөрлийг олгосон болон ямар нэгэн байдлаар нэр холбогдсон яам, агентлагийн таван даргыг ажлаас нь чөлөөлөөд байгаа. Тодруулбал, Иргэний нисэх ерөнхий газрын дарга М.Эрдэнэбилэг, “Чингис хаан” олон улсын нисэх буудлын дарга М.Даваажав, Гаалийн ерөнхий газрын дарга Б.Цэнгэл, Зам тээврийн яамны Агаарын тээврийн бодлогын хэрэгжилтийг зохицуулах газрын дарга С.Мөнхнасан, Хилийн 0218 ангийн захирагч хурандаа Д.Ганбаатар, Буянт-Ухаа дахь Гаалийн газрын дарга З.Сырымбек нарын хүмүүс ажлаасаа чөлөөлөгдөөд байна.

Уг хэргийн жинхэнэ эзнийг олж илрүүлэх ажлыг цагдаа, хууль хүчний байгууллагаас үргэлжлүүлэн явуулж байгаа талаар эх сурвалж мэдээллээ.

Тэгвэл уг сэтгүүлийг хэвлэн зарж байсан "Хүннү лорд" компанийн захирал нь 24 настай М.Долгормаа гэх бүсгүй байдаг аж.  М.Долгормаа нь “Үндэсний үйлдвэрлэгч мянга гаруй аж ахуй нэгж, байгууллагын үйл ажиллагааг гадаадын жуулчдад сурталчилах, хөнгөлөлттэй нөхцөлөөр аяллын хөтөлбөр санал болгох зорилготой “Access” сэтгүүлийг гаалийн хяналтын бүсэд худалдаалах талбай болох хоёр метр квадрат талбай түрээслэх” хүсэлтээ “Чингис хаан” олон улсын нисэх буудлын захирал М.Даваажавд хүргүүлсэн байна. Харин М.Даваажав нь боломжгүй гэх хариултыг өгчээ. Үүний дараа "Буянт-Ухаа" дахь Гаалийн газрын дарга З.Сырымбекээс зөвшөөрөл авч хүссэнээр хяналтын бүсэд гар дээрээс худалдаа хийх зөвшөөрөлтэй болжээ.

Одоогоор ажлаасаа халагдсан хүмүүс "Би зөвшөөрөл олгоогүй" гэх тайлбарыг өгч байгаа боловч ямар нэгэн байдлаар уг сэтгүүлийн бизнест холбоотой гэж байгаа юм. Цаашилбал Ерөнхий сайдын ахлах зөвлөх Дэлгэрмаагаас ч эхлэлтэй бизнес байж болно гэж эх сурвалжууд хэлж байгаа.  Мөн “Чингис хаан” олон улсын нисэх буудлын захирал асан М.Даваажав Ерөнхий сайдад “Сэтгүүлийг худалдаалах зөвшөөрөл, чиглэлийг үнэндээ Зам тээврийн яамнаас чиглэл өгч, би зөвшөөрөл олгосон” гэж хэлж байсан билээ.

Харин энэ хэрэг нь сүүл, сүүлдээ асуудал болж ингэж өөрсдийг нь орооно гэж эрхэм дарга нар бодоогүй биз. Үндсэндээ тэд аялал, жуулчлалын компанийн захирал гэгдэх 24 настай бүсгүйд араараа мад тавиулчихлаа. 24 настай бүсгүйн ятгалгаар Толгойгоо угаалгаж, албан тушаал, эрх мэдлээ урвуулан ашигласныхаа хариуд тэд ажил ч үгүй, нэр хүнд үгүй болж гүйцлээ. Үүнийг төсөөлөө ч үгүй явж байсан биз.

Энгийн нэг компани гаалийн хяналтын онцгой бүсэд худалдаа эрхлэх зөвшөөрөл авч чадахгүй. Харин бусдаа илүү эрх, мэдлийг авч чадсан чадсан уг компанийн цаана маш том эрх, мэдэл албан тушаалтай хүн байна. Харин тэр нь хэн болох нь удахгүй тодорхой болох биз. Олон нийтийн зүгээс цөөн хэдэн хурган даргыг ажлаас нь чөлөөлөөд өнгөрөх бус жинхэнэ эзнийг нь олох хэрэгтэй гэж үзэж байна.

24tsag.mn дуулиант сэтгүүлийн зарим зургийг анх удаа олон нийтэд хүргэж байна.

Сэтгүүлийн үнийг 310 мянган төгрөг гэж бичсэн байна.

Т.Энхэлээ