Ерөнхий сайд асан Н.Алтанхуягийн ахлах зөвлөх Л.Гансүх нарт холбогдох шүүх хурал Баянзүрх, Сүхбаатар, Чингэлтэй дүүргийн шүүхэд болж байна. Өчигдөр эхэлж, өнөөдөр өглөө 9 цагт үргэлжилж буй шүүх хурал өмгөөлөгч нар шүүгдэгчдээс асуулт асууснаар өрнөлөө. Л.Гансүх нарыг буруутгаж байгаа нүүрсний жингийн зөрүү, үнийн зөрүү гэсэн асуудлыг өмгөөлөгч нар хөндсөн юм.
Гэрэл зургийн эх сурвалж: www.mminfo.mn сайтын зурагчин Г.Аргуужин
Шүүгдэгчид болон тэдний өмгөөлөгчид Нүүрс хөтөлбөрийг хэрэгжүүлэх гэрээнд жингийн болон үнийн зөрүү гэдгийг огт тусгаагүй хэрнээ хөтөлбөр дууссаны дараа Багануур ХК-ийг ийм асуудал гаргасан нь зохисгүй хэрэг хэмээн үзэж буйгаа илэрхийллээ.
Жингийн зөрүү гэдгийг шигшиж ангилсан нүүрснээс гарсан нунтаг, ангилахад гарсан чулуу, тээвэрлэх үед вагон дээрээс алдагдсан нүүрс, өвөл хөлдөөд ууршсан нүүрс хавар хатахаараа хөнгөн болсон зэрэг жингийн алдагдал хэмээн тайлбарлалаа. Нүүрс хөтөлбөрийн үед 3 төрлөөр шигшиж ангилсны хоёрыг нь Багануур ХК, зөвхөн нэгийг нь “Эм Жи Эл Эс Би Ди” компани борлуулсан байна. Гэтэл Багануур ХК өөрсдөө дийлэнхийг худалдсан байж шүүгдэгч нараас нэхэмжлээд байгаа нь утгагүй хэрэг хэмээн шүүгдэгчид мэдүүллээ.
Үнийн зөрүүний хувьд 2013 оны 8 сарын 8-нд Багануур ХК-ны ТУЗ иргэдэд борлуулах нэг тонн нүүрсний үнийг 39000 гэж тогтоосон байна. Энэ нь шигшиж ангилсан нүүрс биш зөвхөн уурхайгаас гарч байгаа нүүрсний үнэ аж. Ингээд “Эм Жи Эл Эс Би Ди” компанитай 27500 төгрөгөөр худалдахаар гэрээ хийсэн. Харин энэ нь шигшиж ангилсан нэг тонн нүүрсний үнэ юм. Ийм гэрээг Багануур ХК-ийн удирдлагууд болох н.Отгонбаяр, н.Бямбажаргал нарын 5 хүн гарын үсэг зурж баталгаажуулаад тус үнээр нүүрс хөтөлбөр 2 жилийн хугацаанд үйл ажиллагаагаа явуулжээ. Хөтөлбөр дууссаны дараа Багануур ХК нүүрсийг 39000 төгрөгөөр худалдах ёстой байсан хэмээн 8 сарын 8-ны тогтоолыг гаргаж үнийн зөрүү гэсэн асуудлыг хөндсөн байна. Гэтэл “Эм Жи Эл Эс Би Ди” компанитай хийсэн 27500-гийн гэрээ байсаар байгаагаас гадна тус компани 27500-аар борлуулсан бүх нүүрсний төлбөрөө барагдуулчихсан тул алдаа гаргаагүй гэдгийг өмгөөлөгч нар хэллээ. Мөн дээрх гэрээг гэрчлэх ёстой Багануур ХК-ийн ажилтнууд хил давсныг онцолсон юм.
Дээрх асуудлуудтай холбогдуулан өмгөөлөгч Ц.Баасандорж шүүгдэгч нараас асуулт асууж хариулт авлаа.
Ц.Баасандорж “Нүүрсийг ялгаж ангилахад гарсан чулуу, Багануур ХК-ийн зарсан нунтаг нүүрс, вагон дээрээс алдагдсан нүүрс зэргийн төлөө та бүхнийг яллаад байна уу?” хэмээн асуухад
Шүүгдэгч нар “Тийм л болж таараад байна. Уг нь гэрээг анх байгуулахдаа жингийн зөрүү, үнийг зөрүү гэдэг зүйлийг огт ярьж тусгаагүй, ийм зүйл ярьж байгаа нь зохисгүй юм” гэв.
Ц.Баасандорж: “Эм Жи Эл Эс Би Ди” биш Багануур ХК-д Нүүрс хөтөлбөрийг хэрэгжүүлэх эрх олгож болоогүй юм уу?
Л.Гансүх: “Энэ хөтөлбөр эхлэх хугацаа маш богино байсан. Харин Багануур ХК-ийн охин компани Багануур элч ХК өөрсдөө ямар ч тоног төхөөрөмжгүй, шинэчлэл хийх хөрөнгөгүй, 5 хүний бүрэлдэхүүнтэй төрийн өмчит компани байсан учир хөтөлбөрийг хэрэгжүүлэх боломжгүй байсан” гэж хариуллаа.
Мөн тэрээр “Хамгийн гол нь энэ хөтөлбөр дуусчихсан, намайг Солонгос руу эмчилгээ хийлгэхээр явчихсан байх хойгуур АТГ-аас Л.Гансүх Нүүрс хөтөлбөрийн хүрээнд улсад олон тэрбумын хохирол учруулсан учир оргон зайлсан хэмээн мэдэгдсэн. Мөн Н.Алтанхуягийн Засгийн газар огцрохын өмнөх өдөр бид нарын 7 хүнийг цагдан хорьсон. Энэ бол Засгийн газрыг унагаах зорилготой үйл ажиллагаа байсан бөгөөд улс төрийн зорилготой яллах гэж байна” гэв.
Шүүх хурал 13.30 цаг хүртэл түр завсарлаад байна. Завсарлагааны дараа Ерөнхий сайд асан Н.Алтанхуяг нарын гэрчүүд мэдүүлэг өгнө.
Б.Батчимэг
www.24tsag.mn
