Дэлхийн улс оронд суралцагч монголын оюутан, залуучуудын холбооноос нийслэлийн 1800 иргэнд англи хэлний сургалт үнэ төлбөргүй зохион байгуулахаар болсон тухай мэдээллийн дагуу тус холбооны тэргүүн Н.Лхагвадоржтой ярилцлаа.

Асуулт: Сайн байна уу? Юуны түрүүнд та бүхэн өөрийн байууллагын талаар танилцуулна уу?

Хариулт: Манай холбоо нь дэлхийн 30 оронд суралцагч монголын оюутан, залуучуудын өөрөө удирдлагын байгууллагуудын анхдугаар чуулга уулзалтаар албан ёсоор 2013 онд байгуулагдсан. Өнөөдөр бид нийт 34 оронд буй салбар, төлөөлөгчдөөрөө дамжуулан дэлхийн улс оронд сурч, хөдөлмөрлөж, амьдарч буй монгол иргэдийг нэгдсэн зохион байгуулалтанд оруулж, тэдэнд чиглэсэн үйл ажиллагааг зохион байгуулахын зэрэгцээ эх орноо харь улсад сурталчилан таниулах зорилготойгоор ажиллаж байна.

Асуулт: Өнгөрсөн хугацаанд хийж гүйцэтгэсэн ажлаасаа дурьдаач?

Монгол иргэд хоорондын харилцаа холбоог бэхжүүлж, тэдний зовлон жаргал, сайн муу бүхнийг хуваалцаж байх үүднээс урлаг спорт, сургалт семинараас эхлээд монгол наадам, цагаан сар тэргүүтэй үндэснийхээ баяр наадам, олныг хамарсан арга хэмжээг уламжлал болгон зохион байгуулсаар байна. Сүүлийн жилүүд эх орноо харь улсад сурталчилан таниулах ажлууд дээр түлхүү анхааран ажилласан байна. Харин 2015 оноос бид зөвхөн гадаадад үйл ажиллагаагаа хэрэгжүүлэх бус эх орондоо өөрсдийн сурсан мэдсэн зүйлсээ хуваалцах нь зүйтэй юм гэдэг нэгдсэн дүгнэлтэнд хүрч 2015 оны 4 сард монголдоо салбар зөвлөлөө нээж “Сурсан мэдснээ таньтай хуваалцья” уриан доор “Англи хэлтэй дотуур байр”, “Англи хэлтэй аймаг-2015” зэрэг аяныг хэрэгжүүлж, нийт 5000 орчим иргэдэд сургалт, 20000 орчим иргэдэд үнэгүй лекц, уулзалт хийхийн зэрэгцээ 3000 гаруй сурах бичиг дурсгасан байна.  

Асуулт: Нийслэлийн 1800 иргэдийг үнэгүй англи хэлжүүлэх талаар иргэдийн дунд багагүй хүлээлт үүссэн байна. Энэ аян хэрхэн хэрэгжих вэ?

“Сурсан мэдснээ таньтай хуваалцья” уриан дор хэрэгжиж буй аяны 3-р үе буюу төгсгөлийн шат нь “Англи хэлтэй дүүрэг-2015” аян юм. Үүний хүрээнд бид нийслэлийн 1800 иргэдэд гадаад, монгол багш нарын бүрэлдэхүүнтэй бүх түвшний англи хэлний сургалтыг 2 үе шаттайгаар зохион байгуулах гэж байна. Энэ аян нь нийслэлийн 9 дүүрэг бүрт 15-с дээш насны 200 иргэдийг хамруулах бөгөөд тухайн дүүргийн засаг даргын тамгын газар, бүх л хороодуудын оролцоотой зохион байгуулах юм. Өнөөдрийн байдлаар нийслэлийн бүх дүүргийн удирдлагууд дэмжин ажиллахаа илэрхийлээд байна.

Асуулт: Дүүрэг тус бүрийн 200 иргэдийг яаж шалгаруулах вэ?

Нийслэлийн хэмжээнд 10000 ширхэг сугалааг нийт 9 дүүрэгт тэнцүү хуваарилж, дүүргүүд өөрсдийн хороо тутамд мөн тэнцүү хуваарилснаар нэг дүүргээс сурах иргэд хороо бүрээс тэнцүү бүрдэх юм. Тус сугалаа 2015.09.21 гэхэд нийт дүүргүүд, хороодод тараагдсан байх ба тус сугалааны тохирол хороо бүрнээ 2015.09.27-ны дотор явагдна. Гэхдээ эдгээр 200 суралцах иргэдээс 30 иргэдийг тус сугалаанд хамруулалгүй сонгох бодолтой байгаа. Тэдгээр 30 иргэд нь нийгмийн эмзэг давхаргын 15-с дээш насны иргэд байх болно.

Асуулт: Сургалтын хугацаа хэр байх бол?

Аян нийтдээ 5 долоо хоног үргэлжилнэ. Үүний эхний хоёр 7 хоногт сугалаа, сонгон шалгаруулалт, түвшин тогтоох шалгалт, аяны нээлтийн хурал болон дүүрэг тус бүрийн ерөнхий боловсролын 10-12р ангийн сурагчидад “Ирээдүй таны гарт” лекц уншилт явагдах бол сүүлийн  гурван 7 хоногийн хугацаанд нийт 48 цагийн англи хэлний сургалт өдөрт 3 цагийн хугацаанд 15.00-18.00 цаг, 18.00-21.00 цаг гэсэн ээлжүүдээр ажлын өдөр бүр явагдна.

Асуулт: Сургалт хаана явагдах вэ?

Дүүрэг тус бүртээ явагадах ба ихэнхи дүүргүүд өөрсдийн 3 хороодын хурлын тэнхмийг сургалтын тэнхим байдлаар ашиглуулахаар санал болгож байна. Зарим дүүргүүд өөрсдийн харьяа ЕБС-н сургуулиудад анги тэнхим гаргаж өгөх байдлаар зохицуулалт хийж байна.

Асуулт: Тус сургалтын үр дүн хэр байх бол? Дүүргүүдийн хооронд ч юмуу эсвэл суралцагчдын хооронд өрсөлдөөн бий юу? Шилдэг суралцагчийг гадаадад сургана гэсэн. Хэрхэн тодруулах талаар?

Өрсөлдөөн бий. Аян 2 үе шаттай хэрэгжих тухай дээр ярьсан. Эхний үе шат нь дүүрэг тус бүрийн 200 иргэд сургалтын үр дүнгээр жагсаж, тэдний эхний 5 иргэд дараагийн 2-р шатанд шалгарна. 2-р шатанд шалгарсан дүүрэг тус бүрийн 5 иргэд буюу нийт 45 иргэд харгалзах түвшиндээ нэгдэн сууж, тэдний сургалтын чанар, үр дүнгээр дахин жагсааж 1-р байр эзэлсэн нэг суралцагчийн төлбөрийг хариуцаж гадны сургуулийн хэлний бэлтгэлд суулгах байгаа. Сургалтын үр дүнгийн хувьд бид иргэдэд хэрэглээний түвшний англи хэлийг эзэмшүүлж, дунд болон гүнзгийн түвшинд хүргэх зорилго өвөртлөн ажиллаж байна.

Асуулт: Шилдэг суралцагч хаанахын аль сургуульд суралцах бол?

Бид өнөөдөр гадны олон сургуультай хамтран ажиллаж байна. Учир нь тэдгээр сургууль бүрт монгол оюутнууд суралцаж байна. 2015.10.11, 12-нд бид гадны 10 гаруй улсын их дээд сургуулийн төлөөллийг монголдоо урьж, боловсролын мэдээллийг үнэ төлбөргүй танилцуулахаар урьсан байгаа. Иргэд яг бодитоор англи, америк, канад, австрали гэх мэт орнуудын сургуулиудтай нүүр тулан хүссэн мэдээллээ авах боломжтой юм. Эдгээр сургуулиудаас нэгэнд нь суралцах ба одоогоор нууц хэвээр үлдээе дээ.

Асуулт: “Англи хэлтэй аймаг” аяны шилдэг аймгууд тодорсон гэсэн. Ямар аймгууд бол?

Өнгөрсөн аян буюу “Англи хэлтэй Аймаг” аянд нийт 18 аймаг хамрагдсан ба бүх аймгийн холбогдох байгууллагууд дэмжин ажиллаж, эцсийн дүндээ Дархан, Говь-Алтай, Хэнтий аймгууд шилдгээр тодорсон байгаа. Удахгүй эдгээр аймгуудад очиж, талархлаа илэрхийлэх болно.

Асуулт: Энд ямар нэгэн нам эвсэл, болон улс төрийн нөлөөлөл байгаа юу?

Байхгүй. Гадаадад суралцаж буй болон сурсан залуус бид зөвхөн сурсан мэдсэнээ бусадтайгаа хуваалцъя гэсэн чин хүсэл эрмэлзэлдээ хөтлөгдөн хэрэгжүүлж байгаа. Манай нийгэм улс төрийг бүх шатанд хутган ойлгодог болсон байна. Харин бид арай өөр өнцгөөс ажилд ханддаг байхыг илүүд үзэж байгаа.

Асуулт: Дэлгэрэнгүй мэдээллийг хаанаас авах боломжтой вэ?

FB: “АНГЛИ ХЭЛТЭЙ ДҮҮРЭГ-2015” хаягаас авах ба манай ажлын хэсгийн 96090845, 70117834 дугааруудаас мэдээлэлийг авч болно.