Ерөнхий сайд асан Н.Алтанхуягийн ахлах зөвлөхөөр ажиллаж байсан Л.Гансүх нарт холбогдох шүүх хурал Баянзүрх, Сүхбаатар, Чингэлтэй дүүргийн шүүхэд болж байна.Үдээс өмнө Л.Гансүх нарыг буруутгах шалтгаан болсон нүүрсний жингийн зөрүү, үнийн зөрүү гэсэн асуудлыг шүүгдэгчдийн зүгээс тайлбарласан. Харин одоо хохирогчдын асуулга, тайлбар хийгдэж байна. 

Багануур ХК-иас гадна Төрийн өмчийн хороо хохирогч хэмээн шүүх хуралд ороцож байгаа бөгөөд өмгөөлөгч нар асуулт асуулаа.

Төрийн өмчийн хороо Багануур ХК-ийн 75 хувийг эзэмшиж байсан ч одоо хувьцаагаа “Эрдэнэс Монгол” компанид шилжүүлсэн байна. Ингэхээр одоо ямар ч эрх оролцоогүй Төрийн өмчийн хороо хохирогч хэмээн шүүх хуралд оролцож буй нь утгагүй юм. Ийм атал Төрийн өмчийн хороо Багануур ХК-ийн нэхэмжилж буй 331 сая дээр нэмээд 63.9 сая төгрөгийг давхар нэхэмжилж байгааг өмгөөлөгч нар шүүмжилж, асуулт асуулаа.

Өмгөөлөгч: Төрийн өмчийн хороо хохирсон уу?

Төрийн өмчийн хорооны төлөөлөгч: Үгүй

Өмгөөлөгч: Багануурын хохирлыг өмнөөс нь нэхэмжлэх эрхтэй юу?

Төрийн өмчийн хорооны төлөөлөгч: Үгүй л дээ, гэхдээ манай байгууллага чиг үүргийнхээ хувьд нэхэмжлэл гаргасан.

Өмгөөлөгч: Яагаад 331 саяыг танай байгууллага нэхэмжлээд байгаа юм?

Төрийн өмчийн хорооны төлөөлөгч: Шинжээч нар энэ тооцоог гаргасан учир бид нэхэмжилсэн.

Өнөөдөр Төрийн өмчийн хороо бус Эрдэнэс Монгол компани хуралд оролцох ёстой байхад ямар ч хамааралгүй болсон Төрийн өмчийн хороог оролцууллаа хэмээн шүүгдэгч нарын өмгөөлөгч Ц.Баасандорж шүүмжлэв.

Б.Батчимэг