Ерөнхий сайд асан Н.Алтанхуягийн ахлах зөвлөхөөр ажиллаж байсан Л.Гансүх нарыг “Нүүрс” хөтөлбөрөөс их хэмжээний мөнгө завшиж улсад онц ноцтой хохирол учруулсан хэмээн буруутгаж байгаа. Л.Гансүх нарт холбогдох шүүх хурал Баянзүрх, Сүхбаатар, Чингэлтэй дүүргийн шүүхэд болж байна. Хурал 15.30 минут хүртэл түр завсарлага авсан.

Гурав дахь өдрөө үргэлжилж буй шүүх хуралд “Эм Жи Эл Эс Би Ди” компанид аудит хийж буруутай гэсэн дүгнэлт гаргасан Үндэсний аудитын газрын аудитор н.Ичинхорлоогийн мэдүүлэг өгсөн юм.

Санхүүгийн гол дүгнэлт гаргасан хүн учраас н.Ичинхорлоогийн мэдүүлэг олон нийтийн анхаарлыг ихээр татсан. Тэрээр эхэндээ өмгөөлөгчдийн асуултад нэлээд давшингүй хариулж байв. Бичиг цаас харахгүй л бол би бүгдийг нь мэдэхгүй гэх зэргээр өөртөө итгэлтэй хариулж байлаа. Харин дунд хэсэгтээ АТГ-ын комиссарын дүгнэлтийг өөрийнхтэйгээ харьцуулан харсан зэрэг буруутай үйлдэл хийснээ хүлээн зөвшөөрөхөд хүрлээ. Мэдүүлгийг төгсгөл хэсэгт шүүгчид түүнийг ямар хүрээнд аудит хийх ёстой байсан тухай хуулийн заалтыг эргэн харахыг хүссэн юм.

Шүүгч алдаатай аудит хийгдсэн тухай н.Ичинхорлоод хандан хэлэхдээ “Таны  яриад байгаа хуулийн хамрах хүрээ чинь орон нутагт яригдаж байна. Та нар хуулинд заасан заалтаа барих ёстой. Багануур хувьцаат компани алдагдал  хүлээж. Энэ нь аж ахуй нэгжтэй холбогдож. Тэгэнгүүт та нар яагаад хүлээж байгааг хэлэх ёстой. Та зөв нь бол хувийн компанийн санхүүгийн тайланд гүйж орох эрхгүй байжээ. Хуулийнхаа хүрээнд ийм байна гэж хэлмээр байна.”

Мөн н.Ичинхорлоогийн дүгнэлт хүн “гүтгэсэн” дүгнэлт болсныг анхааруулсан юм. Шүүгч “Дүгнэлт аудитын нэг хэсэг нь гэж та өөрөө хэлсэн. Таны дүгнэлтэд зөв, буруу гээд дүгнээд байна. Гэтэл гэм бурууг зөвхөн шүүх эдлэх ёстой. Та биш шүүх л гэм бурууг тогтоодог юм” гэв.

Буруутай эсэх нь тогтоогдоогүй байсан компанид аудитын шинжилгээ хийхийн оронд гэм буруутай гэх дүгнэлт гаргасныг шүүгчид онцоллоо. Тиймээс н.Ичинхорлоод “гүтгэсэн” дүгнэлт гаргасан гэх үндэслэлээр эрүүгийн хэрэг үүсгэж магадгүй байна.

Г.Үжин