Зам тээврийн сайд М.Зоригт МИАТ компанид халаа, сэлгээ хийхээр зэхэж байна. Ингэхдээ тэрбээр өмнө нь МИАТ-ын захирлаар ажиллаж байгаад хувьдаа мөнгө завшсан хэргээр ял сонссон Ц.Орхон нарыг  буцаан Нисэхийн салбарт нь авч магадгүй байгаа аж.

М.Зоригт сайдаас энэ талаар асуухад тэрбээр "Ц.Орхон салбартаа сайн мэргэшсэн залуу. Би түүнд итгэж байгаа" гэж хариулав. Тэгэхээр  тэрбээр Ц.Орхон нарыг буцаан ажилд нь томилох нь үнэн бололтой.
 

Харин үүнийг сонссон УИХ-ын дарга З.Энхболд хатуу эсэргүүцэж байр сууриа илэрхийллээ. Тэрбээр "Зоригт сайдаа Орхон болон бусад шийтгүүлсэн нөхдөд нисэхийн салбарын хаалга хаагдсан" гэлээ.
 

Хэргийг сануулбал,  “Дайны эрсдлийн сан” гэх нэрийдлээр зохиомол даатгалын компаниуд руу МИАТ-ийн их хэмжээний мөнгийг гуйвуулж, мөнгө завшиж, угаасан хэргээр, Анхан болон давж заалдах шатны шүүхээс “МИАТ” компанийн захирал асан Б.Эрдэнэбилэг, Ц.Орхон, Б.Бат-Эрдэнэ, дэд захирал асан Ч.Хоролсүрэн, “Голомт” банкны зургадугаар салбарын захирлаар ажиллаж байсан Г.Саранчимэг нарт тус бүр 11-14 жилийн ял оноосон ч Улсын дээд шүүхээс тэдний ялыг 7-8 жил болгон бууруулсан байдаг.

Эдгээр хүмүүс 2007-2009 оны хугацаанд 9.1 тэрбум төгрөгийг "Дайны эрсдэлийн сан" нэрээр идсэн нь Шүүхээр тогтоогдсон юм. Харин Б.Эрдэнэбилэг, Ч.Хоролсүрэн нар хоёр жил ял эдлээд, эрүүл мэндийн шалтгаанаар суллагдсан. Тэд биеийн байдал муу хэмээн шүүхэд хүсэлт гаргаснаар шүүгчийн захирамжаар ялаас бүрэн чөлөөлөгдсөн байдаг.

Ямартай ч М.Зоригт сайдын энэ үйлдэл олон нийтийн ширүүн эсэргүүцэлтэй тулгарч магадгүй байна.

Т.Энхэлээ