Ерөнхий сайд асан Н.Алтанхуягийн ахлах зөвлөхөөр ажиллаж байсан Л.Гансүх нарыг “Нүүрс” хөтөлбөрөөс их хэмжээний мөнгө завшиж улсад онц ноцтой хохирол учруулсан хэмээн буруутгаж байгаа. Л.Гансүх нарт холбогдох шүүх хурал Баянзүрх, Сүхбаатар, Чингэлтэй дүүргийн шүүхэд болж байна.

Гурав дахь өдрөө үргэлжилж буй шүүх хуралд Ерөнхий сайд асан Н.Алтанхуяг мэдүүлэг өгч байна.  Түүнээс яллагч тал болон өмгөөлөгч Ц.Баасандорж нар асуулт асуув.

Яллагч тал асуув.

-Нүүрс хөтөлбөрийн хэрэгжүүлэхтэй холбоотой засгийн газрын тогтоол байгаа юу?

-Энэ их онцлогтой ажил болсон. 16 хувийн хүүтэй зээлийг 8 хувийн хүүтэй зээл болгохын тулд 38 удаа хуралдсан ч нэг хуудас цаасаар дүгнэлт гарсан. Нүүрсийг хямдруулах үйл ажиллагааг хөтөлбөр гэж байгаа юм. Хүмүүс болохоор хуучин сэтгэхүйгээр олон хуудас цаас нэхээд байна.

-Хөтөлбөр биш ажиллагаа байсан гэж хэлэх гээд байна уу?

-Энэ ажиллагаа биш хөтөлбөр байсан.

Өмгөөлөгч Ц.Баасандорж асуув.

-“МУ-ын засгийн газраас нүүрс хөтөлбөрийг санаачлан хэрэгжүүлээгүй байхад ...” яллах дүгнэлт ингэж гарсан байгаа. Тиймээс танаас Нүүрс хөтөлбөрийг хэрэгжүүлсэн гэх эд мөрийн баримт нэхээд байна. Тийм зүйл байна уу?

Н.Алтанхуяг “Нүүрсийг шуудайлан борлуулах судалгааны ажлын тайлан”-г үзүүлэв

-Энэ тайланг яам хамтарч гаргасан. Энэ хэрэгт Л.Гансүх гэдэг хүн ямар ч буруу байхгүй. Айл гэрт нүүрс нь хямдарч орлоо гэж буруутгах гээд байгаа бол намайг буруутга. МУ-ын засгийн газрыг толгойлж байсны хувьд би хариуцъя. Гэхдээ энэ хөтөлбөр олон айлд тусалсанд би их баяртай байдаг.

“Нүүрс” хөтөлбөр хэрэгжүүлсэн гэдгийг батлах CD-г үзүүлэхийг өмгөөлөгч Ц.Баасандорж хүсэв. Тэрээр “улсын яллагч Нүүрс хөтөлбөр хэрэгжээгүй гээд байгаа, Л.Гансүх гэдэг хүн хэрэгжүүлсэн гээд байгаа тул нотлох баримтаа үзүүлээч” гэсэн юм гэлээ.

Яг одоо тэдгээр CD-нүүдийг үзүүлэх гэж байна.

Г.Үжин