Шүүгдэгч талын өмгөөлөгчид улсын яллагч прокуроруудаас татгалзсан. 

Учир нь өнөөдөр улсын яллагчаар ажиллаж байгаа н.Баярбилэг АТГ-ын хүмүүсийн хамт Л.Гансүх нарын хэрэг эцэслэн шийдэгдээгүй байхад тэднийг улсад их хэмжээний хохирол учруулсан хэмээн олон нийтэд мэдээлсэн.

Үүнээс үүдэж маргааш нь Шинэчлэлийн Засгийн газар огцорч байсан. Гэтэл эдгээр хүмүүс энэ хэргийг яллах гээд сууж байгаа учир бид татгалзаж байгаа юм. Уг нь улсын яллагч нар яллах, цагаатгах аль аль талыг хариуцан төрийг төлөөлөн ажиллах ёстой. Гэтэл эдний үйл ажиллагаанаас төрийг төлөөлж байгаа гэдэг зүйл харагдахгүй байна хэмээн өмгөөлөгч нар тайлбарлав.

Түүнчлэн Ц.Баасандорж өмгөөлөгч "н.Баярбилэг нь дээрх мэдээлэлд миний гар бичмэлийг баримт болгон дэлгэж байхад ёс зүйгээ ухамсарлаад зогсоох ёстой. Гэтэл ингээгүй нь мөн улс төрийн зорилго агуулагдаад байгаа илтгэж байгаа юм" гэсэн юм. 

Тэгвэл өмгөөлөгчдийн хүсэлтийг шүүх бүрэлдэхүүн татгалзсан тогтоол гаргажээ. Үүнийг н.Цэрэнжээ өмгөөлөгч эсэргүүцэж, хуульд шинжээч нарын дүгнэлтийг байцаан шийтгэх ажиллагаанд оролцуулж болохгүй гэдгийг хуульд заасан атал хуулиа зөрчиж, байцаан шийтгэх ажиллагаанд оролцуулах гээд байгаа учир би шинжээч нарыг байцааж, асуулт асуух үйл явцад оролцохгүй. Үнэхээр оролцох эрхтэй хүн нь би өөрөө гараад явчихъя. Үүний хариуцлагыг над дээр тооцоорой" хэмээн хатуухан хэлэв. 

Харин хохирогч талын өмгөөлөгч н.Энхбаяр шүүх хурлыг түр завсарлуулах хүсэлт гаргав. Үүнийг шүүгдэгч талын өмгөөлөгч нар мөн дэмжив. Гэхдээ н.Цэрэнжээ өмгөөлөгчийн гаргасан хүсэлтийн дагуу шүүх хурал 10 минут завсарлалаа.