Өнөөдөр болох зарим үйл явдлыг танилцуулж байна.
10:00 цагт: "Их хотын барилга 2015" үзэсгэлэн МҮЭСТО-нд зохион байгуулагдах гэж байна. Үзэсгэлэнд: Шинэ орон сууц, ББСБ, Барилгын туслах материалын худалдаа үйлчилгээ эрхлэгч байгууллагууд болон холбогдох албаны хүмүүс оролцож тууз хайчлах үйл ажиллагаа болно.
10:00 цагт: Улаанбаатар хотод тоон телевизийн шилжилт хэрэгжихтэй холбоотойгоор МТШХХГ нь иргэд олон нийтэд тоон телевизийн талаар мэдлэгийг түгээх “Тоон телевизийн хэрэглэгчийн хүлээн авах төхөөрөмжийн танилцуулга, худалдаа”-г өөрийн байранд зохион байгуулна.
11:00 цагт: Хубилай хааны мэндэлсний 800 жилийн ойн арга хэмжээний хүрээнд Соёлын гавьяат зүтгэлтэн, зохиолч Д.Жамьянгийн "Чингис, Өгөдэй, Хубилай сэцэн хаан"-ы романы нээлт Хүүхдийн номын ордонд болно.
11:00 цагт: Их Британи улсын соёлыг таниулах, хоёр орны хоорондын харилцааг бэхжүүлэх зорилго бүхий "GREAT BRITISH FAIR" соёлын өдөрлөг Үндэсний Соёл Амралтын Хүрээлэнгийн "Хар сувд"-д болно.
11:00 цагт: Ой модны салбарын ажилчдын өдрийг угтан БОНХАЖЯ-ны Төрийн нарийн бичгийн дарга Ц.Цэнгэл, Ойн бодлого зохицуулалтын газрын дарга Ц.Банзрагч, Ой модны үйлдвэрлэл эрхлэгчдийн холбооны ерөнхийлөгч Ц.Даваасүрэн зэрэг албаны хүмүүс БОНХАЖЯ-ны “Хаан танхим”-д хэвлэлийн бага хурал хийнэ.
11:30 цагт: Нарны зам дагуу байрлах "Саруул" төвийн урд "Мөнхийн үсэг" группын байранд "Азхур" номын их дэлгүүрийн нээлт болно.
12:30 цагт: “Хүсэл зорилгоо нэгтгэе”, “Хохирогчдын холбоо”, “Иргэний шударга шүүх” ТББ-аас Өршөөлийн хуулийн талаар "Зууны мэдээ" сонины Үндэсний мэдээллийн төвд мэдээлэл хийнэ.
13:00 цагт: Хүнс, хөдөө аж ахуйн яамнаас жил бүр зохион байгуулдаг "Шилмэл мал 2015" үзэсгэлэн худалдаа Яармагийн дэнжид зохион байгуулагдана.
14:00 цагт: Дэлхийн багш нарын баярын өдрийг угтсан “Гар бөмбөг”ийн тэмцээн нийт их, дээд сургуулиудын багш нарын дунд зохиогдоно. Арга хэмжээний нээлт ШУТИС-ийн спорт зааланд болно.
