Улаанбаатар хотын Ерөнхий менежерийн тушаалын дагуу нийслэлийн зургаан дүүргийн нийтийн эзэмшлийн гудамж, зам талбайн гэрэлтүүлгийг 2014 оноос эхлэн “Нийтийн үйлчилгээний Улаанбаатар нэгтгэл” хариуцан ажиллаж байгаа.

Нийслэлийн хэмжээнд 2014 оны байдлаар нийт 7286 ширхэг гэрэлтүүлгийн шон, 10749 ширхэг гэрэлтуүлэгчийг хүлээж авч байсан байна. Тэгвэл одоо 9025 ширхэг гэрэлтүүлгийн шон, 13471 ширхэг гэрэлтүүлэгчийн байнгын арчлалт засвар үйлчилгээнд хяналт тавин ажиллаж байгаа аж.

Харин нийтийн эзэмшлийн гудамж, зам талбайн гэрэлтүүлгийн асалт дунджаар 70-80 хувьтай байсан бол ашиглагч байгууллагуудын үйл ажиллагаанд тавьж байгаа байнгын хяналтын үр дүнд одоогийн байддаар 95 хувьтай байгаа гэнэ. Гэрэлтүүлгийн асалтад байнгын хяналт тавих тогтолцоог бүрдүүлснээр доголдол гарсан хэсгийн засвар үйлчилгээг богино хугацаанд хийж, гэрэлтүүлгийн асалтын хувийг унагахгуй байх боломжтой болсон байна.