Нийслэлийн Хог хаягддын менежментийн ажлын хэсэг хуралдаж, хог тээвэрлэгч байгууллагуудтай иргэдийн бүлэг, олон нийтийн байцаагч нар хэрхэн хамтарч ажиллаж байгаа талаар ярилцсан байна.
Нийслэлийн хэмжээнд 487 иргэн хамрагдсан 70 иргэдийн бүлэг байгуулагдаж хог хаягдлыг багасгахад хог тээвэрлэгч байгууллагуудтай хамтран ажиллаж байгаа ажээ.
Хурлын үеэр нийслэлийн төвийн зургаан дүүргийн хог хаягдалд хяналт тавьж буй төрийн бус байгууллагынхан “Хог ачилт тээвэрлалтэд жолооч ачигч нараас гадна иргэдийн бүлгийн гишүүд анхаарч түүвэр цэвэрлэгээ хийж байгаа нь хог хаягдлыг багасгахад чухал үүрэг гүйцэтгэж байна” гэдгийг онцолсон байна.
Цаашид хог их цугладаг газруудад хогийн сав байршуулж техник ажиллагаагаар хогийг нь машинд ачдаг болох юм. Энэ ажлыг хэрэгжүүлэхээр Улаанбаатар хотын Захирагчийн ажлын албанаас дүүргүүдээс үүсмэл хогийн цэгийн судалгааг нэгтгэн авч байгаа. Ирэх сараас мэргэжлийн хяналт, цагдаагийн байгууллагатай хамтран олон нийтийн байцаагчдыг чадваржуулах нэгдсэн сургалт зохион байгуулахаар төлөвлөв хэмээн Нийслэлийн ХМА-аас мэдээллээ.
