ХҮН намынхан Ховд аймагт ажиллаа. Аймгийн төвийн хүнсний захууд, барилга бүтээн байгуулалтууд, үйлдвэрүүд, коллеж, сургуулиудаар орж иргэдтэй уулзаж ярилцсан байна. Хөдөө орон нутгийн иргэдийн дэмжлэг, талархалыг ихээр хүлээж буй ХҮН намын төлөөлөгчид орон нутагт намын үйл ажиллагаагаа идэвхжүүлэн, салбар хороодоо байгуулахаар ажиллаж байгаа билээ. Ховд аймгийн намын хороог байгуулах анхдугаар хурлыг гишүүд, дэмжигчдийн оролцоотойгоор амжилттай зохион байгууллаа.

ХҮН намын дарга С.Боргил намын хурал дээр хэлсэн үгэндээ:

“Энэ зун Улаанбаатар хотод салбар хороодоо байгуулсан ХҮН намын гишүүд бид орон налгар сайхан намар цагт нутгийн иргэдийн тулгамдсан асуудал, эрэлт хэрэгцээ, санал хүсэлтийг сонсон явж байна. Ховд нутаг бол олон үндэстэн ястан эвлэлдэн суудаг, ажилч хичээнгүй чанартай хөдөлмөрч түмнээрээ хэзээний алдартай. Энэ нутгаас Монголын эрх чөлөөний төлөө тэмцсэн олон хөдөлгөөн үүссэн. Манжийн дарангуйллыг халах хамгийн том тулаан энэ нутагт эхэлж, бүх монголчуудын нэгдмэл цэргийн хүч Ховд хотыг чөлөөлж байсан. Энэ нутаг бидний бахархаж, дууриал болгодог Ард Аюушын өлгий нутаг билээ. Бид өвгөдийнхөө хийсэн тэмцэл, үйлсээс суралцаж Монгол улсаа одоогийн мухардал, гацаанаас гаргах цаг нэгэнт иржээ. Бид хэдий болтол хүнийрхэж, хөндлөнгөөс шүүмжлэн харж суух билээ. Бид энэ орны хувь заяаны төлөө тэмцэхгүй бол бидний хойч үе биднээр бахархахгүй ээ, тэд биднийг харамсал, гомдлын нүдээр харах болно. Та болохгүй байсныг нь мэдэж байсан биздээ, таньд боломж байсан байна шүү дээ, тэгээд та яагаад юу ч хийгээгүй юм бэ гэж асуух үр хүүхдэдээ та юу гэж хариулах вэ?  ХҮН намын гишүүд дэмжигчид бид хойч үедээ ярих түүхтэй, хийсэн гавьяатай байх болно. Өнөөдөр улс төр гэдэг үг ард иргэдэд бохир, заваан гэсэн утгаар ойлгогддог болжээ. Та бид бүгдээрээ улс төр гэдэг үгийг хамгийн шударга, зөв гэдэг утга оруулах болно. Бид энэ цагийн үүрэгтнүүд, цаг үеийн дуудлагаар төрөгсөд” гэж хэллээ.  

Хөдөлмөрийн Үндэсний Намын үйл ажиллагаа хөдөө орон нутагт иргэдийн зүгээс маш их дэмжлэг, талархал хүлээж байгаа нь намын хороог байгуулах хурлуудын ирцээс тодорхой харагдаж байна. Сонирхож ирсэн олон иргэд намын үзэл баримтлал, ёс зүйн дүрэм болон хөтөлбөртэй танилцлаад олноороо ХҮН намд элссээр байна.