Ерөнхий сайд Н.Алтанхуягийн ахлах зөвлөх Л.Гансүхийн шүүх хурал тав дахь өдрөө үргэлжилж байна. Дөнгөж сая Л.Гансүх нарын өмгөөлөгч Г.Батбаяр “Нүүрс” хөтөлбөрийг хэрэгжүүлж байхад гарсан өдөр тутмын зардлыг танилцууллаа.

Тэрбээр “Хувийн компани улсын ажлыг маш бага зардлаар хийсэн байна. Гэтэл үүнийг улсын яллагч нар дурьдсангүй. Ерөнхий сайд асан Н.Алтанхуягийн мэдүүлэг, Засгийн газрын тогтоол, хуралдааны тэмдэглэл, ажлын хэсгийн ахлагч нарын мэдүүлгээс харахад энэ бол Засгийн газрын ажил гэдэг нь тодорхой байгаа. Би энэ хэргийг өмгөөлснийхөө төлөө 5 удаа цагдаагийн газар дуудагдсан. Хуульчдын холбоонд дуудагдсан. Албан бичиг гаргахад  хэрэгтэн болсон. Уг хэргийг өмгөөлөх үнэхээр амаргүй хэцүү байлаа. Би хуульч мэргэжлээр сурахдаа буруутай хүнийг л яллах ёстой гэж сурсан. Гэтэл өнөөдөр буруугүй хүнийг яллах гэж байна. Яагаад цагаан зүйлийг хараар будаад байгаа юм. 6-7 жилийн турш ийм систем хэрэгжээд эхэллээ. Эхлээд тухайн хүний нэр хүндийг хэвлэлээр гутаана. Тэр хүнийг мөнгө идсэн гэж нийгэмд ойлгуулдаг. Үүн дээр нь үндэслэж шүүх ял өгдөг. Яагаад үнэн мөнийг олохгүй байна. Багануур компанийхан нэг ч удаа гомдол гаргаагүй. Багануурын чийгтэй нүүрс гадаа хатаад жин нь хөнгөрсөн нь энэ хүмүүсийн буруу юм уу. Прокуроруудаа та бүгд ийм зүйлээр энэ хүнийг яллаж байна. Нүүрснээс чулуу гараад хорогдсоныг энэ хүмүүс төлөх ёстой юм уу. Багануурын нүүрсний нунтагийг охин компани нь аваад зарж байна. Энэ ч бас хүмүүсийн буруу юм уу. Төрийн компани хувийн компанийг дээрэмдэж байна. Цөөн хэдэн улс төрийн зорилготой цөөн хэдэн хүмүүс л байгаа. Тэд өөрийнхөө хүмүүсээр яллуулаад. Цаас байхгүй гэдэг шалтгаанаар та нар буруутгаад байгаа биз дээ. Миний үйлчлүүлэгч Л.Гансүхийг цагаатгах ёстой. Хэрвээ гэмт хэрэг хийсэн гэж үзэж байгаа юм бол яг ямар гэмт хэрэг хийснийг нь тодорхой хэлэх ёстой. Ямар үйлдлийг гэмт хэрэг гэж үзсэнээ л тодорхой бич. Л.Гансүх ямар нэгэн гэмт хэрэг хийгээгүй"  гэлээ.

Харин Цэрэнжээ өмгөөлөгч "Яллах дүгнэлтэд хувийн ашиг сонирхлоо гүйцэлдүүлсэн гээд бичсэн байна. Энэ хүмүүс хувийн ашиг сонирхлоо гүйцэлдүүлсэн ганц ч нотлох баримт байхгүй. Нүүрсний үнийн зөрүүний асуудал, Жингийн зөрүүний асуудлыг  прокурорууд бичсэн. Гэтэл энэ нь Л.Гансүх нар холбоотой байх ямар ч боломжгүй. Ийм л зүйлийг яриад байна. Энэ талаар өмгөөлөгч асуудаг шинжээч нар огт хариулдаггүй" гэв.

Т.Хулан