Өнгөрсөн өвөл чөлөөт бөхийн тамирчин, дасгалжуулагчид мэдээлэл хийж холбооны удирдлага болох Д.Дагвадоржтой хамтарч ажиллаж чадахгүй гэдгээ дуулгаж байсан.

Тэд Д.Дагвадоржийг холбоондоо хөрөнгө оруулдаггүй, багш, дасгалжуулагчдыг өөрсдийнх нь хөрөнгөөр гадны тэмцээн уралдаанд явуулдаг мөн тамирчид нь хил дээр саатаад байхад анхаарал тавиагүй гэх мэтчилэнгээр буруутгаж байсан юм. Хариуд Д.Дагвадорж аварга мэдээлэл хийж өөрийгөө өмөөрч байсан. Энэ мэт тэдний хэрүүл хэсэг үргэлжилж байгаад намжсан бол ойрноос дахин сөхөгдөж мэдэхээр байна.

Манай чөлөөтийнхөн ДАШТ-ээс түүхэнд байхгүй амжилт гаргасан мөч энэ сард тохиолоо. Тэр дундаа чөлөөт бөхийн эрэгтэйчүүдийн авсан медалийн тоо санаснаас ч бүр илүү байсан. Хоёр ч хүн аваргын төлөө барилдаж мөнгөн медаль авсан. Мөн МУГТ,  С.Батцэцэг дэлхийн аваргын алтан медалиа ихэрлүүлж, МУГТ, дэлхийн аварга С.Цэрэнчимэд мөнгөн медаль хүртсэн билээ. Энэ бүхнийг бодохоор өнгөрсөн хавар бие, биеэ элдвээр хэлж явсан МБХ-ны удирдлага болон дасгалжуулагчдыг эвлэрсэн гэж харж байлаа.  

Гэтэл бас гүйцэд эвлэрч, сайн сайхан болоогүй л юм. Дэлхийн аваргад оролцсон тамирчдыг Эрүүл мэнд, спортын сайд Г.Шийлэгдамба хүлээн авахад шигшээ багийн дасгалжуулагч Ц.Хосбаяр “Бидний энэ удаагийн амжилт Монголын чөлөөт бөхийн холбоонд хамаарахгүй шүү” гэж хэлээд авсан. Энэ нь холбооны удирдлага, дасгалжуулагчид өдийг хүртэл эв зүйгээ олж чадаагүйг харуулав. Харин холбооны дэд ерөнхийлөгч Д.Сумъяабазар телевизийн ярилцлагадаа “Манай холбооны ажлын үр дүн Дэлхийн аваргаар олсон амжиллтай шууд холбоотой” гэж хэлсэн юм. Тэр бүү хэл амжилт гаргасан тамирчдаа алтаар хүртэл шагнасан шүү дээ.

Уг нь олимп хаяанд ирсэн энэ цагт муудалцаж, хэмлэлдэх нь зөв зүйл биш. Харин илүү эвтэй байж сая гаргасан амжилтаас илүүг гаргах ёстой. Тиймээс чөлөөт бөхийн холбооны удирдлагууд болон багш, дасгалжуулагчид аль болох эе, эетэй байж ойлголцох ёстойг иргэд сануулж байна. 

Т.Энхэлээ