Дөрвөн настай охиныхоо аминд хүрсэн хэрэгт буруутгаж буй Т.Цогт, Г.Маралмаа нарт холбогдох хэргийн шүүх хурал Баянзүрх, Сүхбаатар, Чингэлтэй дүүргийн шүүхэд 10:00 цагт эхлэх байсан.

Тэгвэл шүүх хурал эхлэхийн өмнө шүүгдэгч Г.Маралмаагийн биеийн байдал муудсанаас түргэн тусламжийнхан эмнэлэг рүү авч явлаа. Тэрбээр өдгөө 9 сартай жирэмсэн бөгөөд хэзээ мөдгүй амаржих гэж байгаа билээ. Харин шүүгдэгч Т.Цогт шүүхийн танхим руу орлоо.

Уг хэргийн шүүх хурал өнгөрсөн зургадугаар сард болсон бөгөөд шүүх бүрэлдэхүүн хэргийг нэмэлт мөрдөн байцаалтад буцаасан юм. Тухайн үед Улсын яллагчийн зүгээс Т.Цогтод Эрүүгийн хуулийн 107.3, 246.1-т зааснаар яллах дүгнэлт үйлээд байсан.

Харин нэмэлт мөрдөн байцаалтын явцад Т.Цогтын зүйл ангийг өөрчилж, бусдын амь насыг санаатайгаар хохироосон хэрэгт буруутгаж, Эрүүгийн хуулийн 91.2.11, 91.2.12, 91.2.15 дугаар зүйл ангиар яллах дүгнэлт үйлдээд байна. Энэ зүйл ангиар хэрэв буруутай нь тогтоогдвол 10-15 жилийн хорих ял шийтгэх юм.

Түүнчлэн Г.Марлмааг 91.2.15 /хүнийг биеэ хамгаалж чадахгүй байгааг нь мэдсээр байж/, 91.2.12 /онц хэрцгий аргаар/ хөнөөсөн хэрэгт буруутгаж байгаа. Энэ зүйл ангиар шүүхээс гэм буруутай гэж үзвэл 15-25 жилийн ял шийтгэнэ.