Баянзүрх, Сүхбаатар, Чингэлтэй дүүргийн шүүхэд дөрвөн настай охиныхоо аминд хүрсэн хэрэгт буруутгагдаж буй Т.Цогт, Г.Маралмаа нарт холбогдох шүүх хурал өнөөдөр 10.40 цаг орчимд эхэлсэн.

Шүүх хурал эхлэх үед шүүгдэгч Г.Маралмаа ухаан алдаж, түргэн тусламжийн машинаар түүнийг эмнэлэг рүү авч явсан талаар бид мэдээлсэн. 

Тэгвэл шүүгдэгчийн биеийн байдлаас шалтгаалан шүүх хурлыг ирэх сарын 7 хүртэл хойшлууллаа.

Уг хэргийн шүүх хурал өнгөрсөн зургадугаар сард болсон бөгөөд шүүх бүрэлдэхүүн хэргийг нэмэлт мөрдөн байцаалтад буцаасан юм. Тухайн үед Улсын яллагчийн зүгээс Т.Цогтод Эрүүгийн хуулийн 107.3, 246.1-т зааснаар яллах дүгнэлт үйлээд байсан.

Харин нэмэлт мөрдөн байцаалтын явцад Т.Цогтын зүйл ангийг өөрчилж, бусдын амь насыг санаатайгаар хохироосон хэрэгт буруутгаж, Эрүүгийн хуулийн 91.2.11, 91.2.12, 91.2.15 дугаар зүйл ангиар яллах дүгнэлт үйлдээд байна. Энэ зүйл ангиар хэрэв буруутай нь тогтоогдвол 10-15 жилийн хорих ял шийтгэх юм.

Түүнчлэн Г.Марлмааг 91.2.15 /хүнийг биеэ хамгаалж чадахгүй байгааг нь мэдсээр байж/, 91.2.12 /онц хэрцгий аргаар/ хөнөөсөн хэрэгт буруутгаж байгаа. Энэ зүйл ангиар шүүхээс гэм буруутай гэж үзвэл 15-25 жилийн ял шийтгэнэ.