Эрх мэдэлтэй, олон албадтай даргыг Өвөр Монголчууд "бүдүүн дарга" гэж авгайлдаг. Тэгвэл манай улсын "хамаг бүдүүн" даргаар нийслэлийн захирагч Э.Бат-Үүл тодроод байна. Учир нь тэрээр улсынхаа Ерөнхийлөгчөөс ч өндөр цалинтай, Ерөнхий сайдаасаа ч их мөнгөтэй хаана ч байхгүй нүсэр бүтэцтэй мээр болжээ. Тэр арван нэгэн жил засагласан өмнөх дөрвөн даргаасаа дөрөв дахин их мөнгийг гурван жилд зарцуулсныг хэвлүүлүүд онцолж эхлэв.  

Анх Э.Бат-Үүл төрийн хүнд суртлыг багасгана, төсөв мөнгө хэмнэнэ, ард түмний татварын орлогыг аривлан хэмнэнэ, дарга нарын тоог цөөлнө гэсэн ардчилсан амлалтуудыг өгч хотын дарга болсон. Түүнийг хэлсэн ярьсан бүх зарчимынхаа эсрэг зогсоно гэж зүүдлээ ч үгүй. Учир нь Э.Бат-Үүл хотын дарга болонгуутаа орон тоог нэмэгдүүлж, дарга нарын тоог тултал нь нэмж, хүнд сурталын бүхэл бүтэн арми үйлдвэрлэж, ард түмний татварын мөнгө, төсвийн хөрөнгийг гарын салаагаар урсгах болсныг дараах тооноос харж болно.  

НИТХ гэж байгууллага бий. МАН-ын үед нэг хэлтэстэй, 17 хүнтэй гэж баахан баалуулж байлаа. Гэвч Э.Бат-Үүл даргын үед 3 хэлтэстэй 40 ажилтантай болж өргөжлөө. Үүний дагуу 9 дүүргийн хурлын байгууллагын 9 нэгжид 84 хүн ажиллаж байсан бол өдгөө 23 нэгж 232 хүнтэй болж бараг гурав дахин данхайжээ. Нийслэлийн засаг даргын тамгын газар 87 ажилтантай байсныг 115 болгожээ. Нийслэл МАН-ын үед 154 агентлагтай 2570 ажилтантай байсан бол өдгөө 204 агентлаг 3216 ажилтантай болж 691 хүнээр эгнээгээ тэлжээ. Үүнээс гадна төвлөрсөн төсөвт, нийслэлийн төсөвт, аж ахуйн төсөвт, нийслэлийн өмчит гэх мэт газруудын тоо ч нэмэгдсэн байна. МАН-ын үед нийслэл нийтдээ 286 бүтцийн нэгжид 10669 хүн ажиллаж байсан бол АН-ын үед 421 нэгж бүтэцтэй, 13569 ажилтантай болж бүтцийн нэгж 202-оор, ажилтны тоо 2954-өөр нэмэгдсэн байна. Хасагдаж, танагдсан зүйл нэг ч байхгүй. МАН-ын үед байсан орон тоо, бүтэц бүгд томорч, тэлжээ. Бүтцийг цомхон болгож, орон тоог хасч, дарга нарын тоог цөөлнө гэсэн Э.Бат-Үүлийн бодлого хаана байна вэ? Нийслэлийн нилээд олон засаг дарга цалингүй ажиллаж байгаа. Тэд авлигаасаа цалинжаад байна уу гэдгийг ч шалгах цаг ирлээ.

Саяхан Ерөнхий сайд Ч.Сайханбилэг улсын төсөв хүндэрснийг хүлээн зөвшөөрч улс төрчдийн цалинг 30 хувиар хасах болсноо дуулгасан. Тэр санал дээр тулгуурлан томорч тэлсэн нийслэлийн бүтэц, орон тоог хумиж, дарга нарыг нь цөөлж МАН-ын үед ямар байсан тэр хэмжээнд нь хүргэвэл олон тэрбумыг хэмнэх боломж байгаа л даа.

МАН-ын үед хот хэмээх айл нийт ажилчдынхаа цалинд 25.7 тэрбум төгрөг зарцуулдаг байсан бол АН-ын үед 50.1 тэрбум төгрөг болж бараг хоёр дахин тэлжээ. Ингэж ард түмний мөнгийг үрж, төрийн хүнд суртлыг нэмдэг, хурган дарга нарынхаа тоог өсгөдөг Э.Бат-Үүлийг "хамаг бүдүүн" дарга гэж өргөмжлөхөөс ч яахав.

Эх сурвалж: Улс төрийн тойм