“Жаст” группийн захирал асан Ш.Батхүү, "Алтжин” группийн ерөнхийлөгч Г.Алтан нартай холбоотой олон тэрбум төгрөгийн хэрэг дахин дуулиан дэгдээх нь. Цоо шинэ баримттай тус хэрэг өнгөрсөн жилүүдэд олны анхаарлаас ихэд нуугдаж байжээ. Харин энэ талаарх мэдээллийг удахгүй манай сайт хүргэх гэж байна.

"Жаст" группийн ерөнхийлөгч асан Ш.Батхүү нь “Эрдэнэт" үйлдвэрийг барьцаалж, банкны зээлийн баталгаа гаргуулахад шаардагдах бичиг баримт, тамга тэмдэг, эрх бүхий албан тушаалтнуудын гарын үсэг, зээлийн гэрээ, баталгаа зэргийг хуурамчаар үйлдэн Өмнөд Африкийн “Стандарт” банкнаас 109 сая ам.долларын зээл авсан хэрэгт буруутгагдан шалгагдаж байгаа юм. Тэрбээр хуурамчаар гарын үсэг, бичиг баримт үйлдэн зээл авсан гэдгээ хэргийг шалгах явцад хүлээн зөвшөөрсөн байдаг.

Ш.Батхүүгийн зээлсэн 109 сая долларыг “Стандарт” банкныхан Монгол Улсын Засгийн газраас нэхэмжлэн Арбитрийн шүүхэд гомдол гаргаад байгаа юм. Зарим эх сурвалжийн мэдээлж буйгаар  "Стандарт" банкинд тавьсан Ш.Батхүүгийн өрийг манай улсын Засгийн газар төлж эхэлсэн гэнэ.

Тэрбээр "Эрдэнэт"-ийн ордыг барьцаалж авсан мөнгөөрөө "Олон Овоот"-ын алтны төсөлд хэрэглэсэн ч хоёр жилийн хугацаанд алт гараагүйгээс болж төсөл нь бүтэлгүйтжээ. Үүнээс бол Ш.Батхүү “Жаст агро”-гоо татан буулгаж, “Жаст ойл” компаниа “Магнай трейд”-д, “Хадгаламж” банкиа Төрийн банкинд нэгтгэсэн юм. Харин өөрийг нь дампууруулсан гэх "Олон овоот"-ын ордоо бизнесийн хамтрагч Г.Алтангийн хамтаар өөрсдөдөө авч үлджээ.

Тэгэхээр тэрбээр  "Хадгаламж" банкиа улсад өгөөд л олны хэл, амнаас нэг хэсэгтээ мултарч чадсан гэж хэлж болно. Өдгөө Г.Батхүү биеийн байдал нь муудсан гэх шалтгаанаар батлан даалтад гарч, гадуур байцаагдаж байгаа аж.

Жил дамнан шалгагдаж буй тус хэргийн мөрдөн байцаалт чухам ямар түвшинд яваа нь одоог хүртэл тодорхойгүй байгаа юм. Гэтэл түүнтэй холбоотой дахин шинэ хэрэг тун удахгүй ил болох нь.

Энэ талаар манай сайт удахгүй баримттайгаар дэлгэх болно.

Т.Хулан