Нийгмийн даатгалын байцаагчид нас барсан хүний нэрээр мөнгө “завшиж” байсан хэрэг олны дургүйцлийг ихээхэн хүргэж байна. Уг хэргийг Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийнхэн илрүүлэн шалгаж эхэлсэн юм.

 Тодруулбал, нийслэл, орон нутгийн нийгмийн даатгалын байгууллагууд арилжааны банкуудтай үгсэн хуйвалдаж нас барсан ахмад настнуудын нэрээр тэтгэврийн зээл авдаг байжээ. Одоогоор 10 мянга гаруй иргэний нэр яригдаж байгаа гэнэ. Иргэд өөд болсон ахмад настныхаа бичиг баримтыг нийгмийн даатгалд хүргүүлдэг ч төрийн үйлчилгээний ажилтнууд талийгаачийн нэрийг улсын бүртгэлээс хасдаггүй. Харин арилжааны банктай хуйвалдан талийгаачдыг амьд мэтээр улсаас тэтгэврийг нь авсаар байсан аж. Энэ талаар ЦЕГ-ын албаны хүнээс тодруулахад "Хэргийг шалгаж байгаа учир банкуудын нэрийг хэлэх боломжгүй. Мөрдөн байцаалтын ажиллагаа үргэлжилж байна. Шинжээчийн дүгнэлт гараагүй учраас хохирлын хэмжээг хэлэх боломжгүй байна. Гэхдээ нэлээн хэдэн тэрбум төгрөгийн хохирол учруулсан гэж хэлж байна. Тиймээс тэдэнд Эрүүгийн хуулийн тусгай ангийн 148.4-т зааснаар эрүүгийн хэрэг үүсгэн шалгаж байгаа" гэв.

Д.Ундрах /24tsag.mn/