Төмөр замын даланд зарцуулахаар Хөгжлийн банкнаас Солонгосын Самсунг компанийн дансанд 199 сая долларыг шилжүүлсэн. Энэхүү мөнгөний 70 хувийг Самсунг компани Монголын нэр бүхий таван хүний дансруу шилжүүлсэн гэдэг баримтыг Эрүүгийн цагдаагийн газраас гаргаж буй. Тус хэрэгтэй холбогдуулж 2013 онд Зам тээврийн яамны төрийн нарийн бичгийн даргаар ажиллаж байсан Б.Батзаяаг баривчилсан. Харин бусад дөрвөн хүнийх нь дунд Эрүүл, мэнд, спортын дэд сайд асан Т.Болдбаатарын охин гэгдэх Б.Мөнхзул гэх бүсгүйн нэр холбогдоод байгаа юм. Тодруулбал, Хөгжлийн банкны шилжүүлсэн 199 сая доллараас 50 тэрбумыг Б.Мөнхзулын данс руу шилжүүлсэн гэх мэдээлэл зарим мэдээллийн сайтаар гарсан билээ. Тэгвэл энэ талаар Эрүүл, мэнд спортын дэд сайд Т.Болдбаатараас тодрууллаа.

- Танай охины данс руу 50 тэрбум төгрөг орсон гэх мэдээлэл байна. Энэ үнэн үү?

- Энэ талаарх мэдээллийг анх нэг мэдээллийн сайтаас олж харсан. Тэр сайтад бичсэн шиг Б.Мөнхзул гэдэг охин надад байхгүй. Тийм нэртэй хүү ч байхгүй. Тэгэхээр энэ нь миний эсрэг явуулж буй ээлжит гүтгэлэг, явуулга болж байна. Би энэ мэдээллийг анх гаргасан сайтыг шүүхэд өгч, үнэн зөв учрыг нь олуулна. Энэ асуудлаар хууль хяналтын байгууллагаас шалгасан зүйлгүй байна. Дахин хэлэхэд, энэ бол худал мэдээлэл.

Т.Энхэлээ