Эх, хүүхдийн эрүүл мэндийн үндэсний төв дэргэдээ нярайн эндэгдлийг бууруулах дэлхийн жишигт нийцсэн шинэ тасагтай болов. Тус тасгийг JCI төрийн бус байгууллага болон УИХ-ын гишүүн С.Одонтуяа тэргүүтэй хүмүүсийн санаачлага, дэмжлэгээр орчин үеийн стандартын дагуу байгуулсан гэдгийг Эх, хүүхдийн эрүүл мэндийн үндэсний төвийн захирал Ш.Энхтөр хэлж байна. Нярайн эрчимт эмчилгээний тасагт 1987 оноос хойш засвар болон тоног, төхөөрөмжийн шинэчлэл хийгдээгүй аж. Уг тасаг нь өмнө нь хоёрхон амьсгалын аппараттай, цөөхөн инкубатор, шарлагын төхөөрөмжтэй байж, түүндээ дутуу төрсөн болон хүнд өвчтэй нярайгуудаа ээлжилж байрлуулдаг байсан байна. Нэг үгээр хэлбэл, тоног, төхөөрөмжийн тоо амьдрах гэж тэмцэж буй нярайгуудад хүрэлцдэгүй байж. Харин өнөөдрөөс эхлэн дутуу төрсөн нярай бүр өөрийн ор, иж бүрэн тоног төхөөрөмжтэй болж байна. Өнөөдөр нээлтээ хийж буй нярайн шинэ тасаг нь эмчилгээний дөрвөн том өрөө, тусгаарлах хоёр өрөөтэйгээс гадна сургалт, хяналтын өрөөтэй байна. Мөн агаарыг ариусгаж, бүлээн болгодог агааржуулалтын системийг суурилуулжээ. Хүнд өвчтэй хүүхдүүдийг хянах хяналтын систем буюу зайнаас харах камерыг хүртэл байрлуулсан байна. Япон, Солонгос, Германы сэхээний тасагтхэрэглэдэг хамгийн сүүлийн брэндийн тоног төхөөрөмжийг иж бүрнээр нь суурилуулжээ.

Шинээр нээгдэж буй тасгын талаар Эх, хүүхдийн эрүүл мэндийн үндэсний төвийн захирал Ш.Энхтөр ярихдаа “Энэ тасагт иж, бүрэн засвар хийгдлээ. Тоног төхөөржийг Австралийн Засгийн газрын  7 сая евро буюу 150 гаруй тэрбум төгрөгийн тэтгэлгээр авсан. Тоног төхөөрөмжийн угсралт бүрэн дуусаагүй байна. 12 сарын дундуур тоног төхөөрөмжийн угсралт бүрэн дуусна. Мөн Японы Засгийн газрын буцалтгүй тусламжаар нийт 2.5 сая долларын эрчимт эмчилгээ, сэхээн амьдруулах амьсгалын аппарат, төхөөрөмжтэй болсон” гэлээ.

Харин тус тасгийг байгуулахад хөрөнгө оруулсан УИХ-ын гишүүн С.Одонтуяа “Зургаан сарын өмнө JCI байгууллагын залуус ийм төсөл хэрэгжүүлмээр байна гэж ирсэн. Ийм чухал төслийг дэмжихгүй байхын аргагүй. Бид хөрөнгө мөнгийг яаж босгох вэ, засвараа хэзээ дуусгах вэ гэдгийг ярилцсан. Их хэцүү төсөл. Төрийн бус байгууллагаас ийм төслийг хийхэд амаргүй. Сэтгэл байхад шийдэл олддог юм байна. Би хөрөнгө, мөнгө санхүүгийн асуудалд бололцоогоороо тусалсан. Хүмүүсээс санхүү босгоход хамтарч ажилласан. Монгол улс мянганы хөгжлийн зорилтыг хэрэгжүүлэхэд энэ ажил түлхэц үзүүллээ.Одоо ийм тасагтай болсон учир нярайн эндэгдэл буурах байх” гэв.

“Итгэл-Хавдаргүй Монгол” ТББ-ын нарийн бичгийн дарга н.Нарангэрэл хэлэхдээ “Германы төрөх эмнэлэгт орж үзэхэд яг л ийм тасагтай байсан” гэлээ.

Шаардлагатай тоног төхөөрөмжөөр тоноглогдсон тус тасагт дутуу төрсөн 20 гаруй нярай эмчлүүлж байна.

Т.Энхэлээ