УИХ-ын чуулганы нэгдсэн хуралдаанаар “Зээлийн хүүг бууруулах хүрээнд авах зарим арга хэмжээний тухай” Улсын Их Хурлын тогтоолын төслийг хэлэлцэж байна. Энэ үеэр УИХ-ын гишүүн А.Ариунзаяа асуулт асууж, үг хэллээ. 

Тэрбээр "Манайх шиг мөнгөний бодлогыг УИХ-аараа хэлэлцэж, баталдаг улс бараг л байхгүй дээ. Бид нар өөрсдөө нийгэмд буруу дохио өгөөд байдаг. СЗХ-ны хариуцаж байгаа салбарт ач холбогдол өгөхгүй орхичхоод байдаг. Зөвхөн банкаа л яриад байдаг. Иргэдийн амжиргаанд хамгийн ихээр нөлөөлж байгаа банк бус, ломбард, өдөр тутмын зээл зэрэг бүхий л асуудлууд Санхүүгийн зохицуулах хорооны эрхлэх асуудал. Тэгэхээр зээлийн хүүг бууруулахад банкууд гэхээс илүү СЗХ-ны хийх ёстой ажил өндөр ач холбогдолтой. 11-р сар хүртэл ямар ажлуудыг хийж болохуйц байна вэ? Банк бус дээр ямар арга хэмжээ авах вэ" гэж асуулаа. 

СЗХ-ны дарга Т.Жамбаажамц: Хөрөнгийн зах зээл дээр эх үүсвэр татах, дэд бүтцийн байгууллагуудын зардал, шимтгэлийг бууруулах зэрэг ажил байгаа. Компаниуд бонд хэлбэрээр санхүүжилт татах бололцоо нэмэгдсэн. 

Хөдөө орон нутаг болон  хотод үйл ажиллагаа явуулдаг банк бус санхүүгийн байгууллагууд дээр ялгаатай зохистой харьцааны бодлого хэрэгжүүлэх нь эх үүсвэрийн зардалд чухал нөлөөтэй гэж үзсэн. Энэ жилдээ өөрчлөлт оруулна. Банк бус санхүүгийн байгууллагын үйл ажиллагааны тухай хуулийн шинэчилсэн найруулгын төслийг боловсруулсан.