Зам тээврийн яамны Төрийн нарийн бичгийн дарга, “Монголын төмөр зам” ТӨХК-ийн ТУЗ-ийн дарга асан Б.Батзаяа, Ухаахудаг-Гашуун сухайтын чиглэлийн төмөр замын ажлыг гүйцэтгэж байсан Өмнөд Солонгосын “Самсунг С&Т” компанийн захирал Ли Жон Гёл нарыг хоёр сарын өмнө  цагдан хорьж нийгэмд багагүй шуугиан дэгдээсэн.
 

Улмаар өнгөрсөн сард “Самсунг С&Т” компанийн захирал Ли Жон Гёл, Б.Батзаяа нарыг батлан даалтад гаргаад байсан ч  Б.Батзаяаг төд удалгүй эргүүлэн хорьсон байдаг.

 
Тэгвэл өдгөө ШШГЕГ-ын харьяа хорих 461 дүгээр ангид саатуулагдаж буй Б.Батзаяа Өргөдлийн байнгын хороонд өргөдөл илгээгээд байгааг өнгөрсөн удаад бид мэдээлсэн.

Тэрбээр өргөдлөө энэ сарын 18-нд илгээсэн бөгөөд өргөдөлдөө   байнгын хорооны дарга О.Баасанхүүтэй уулзахыг хүссэн төдийгүй өлсгөлөн зарлах гэж байгаагаа ч тусгажээ.

Б.Батзаяаг Эрүүгийн хуулийн 148.4 буюу зохион байгуулалттайгаар бусдын эд хөрөнгийг залилан мэхэлж улсад үлэмж их хэмжээний хохирол учруулсан, 161'1.2 буюу зохион байгуулалттайгаар мөнгө угааж улсад онц их хэмжээний хохирол учруулсан байж болзошгүй гэсэн үндэслэлээр шалгаж  байгаа билээ.

Харин өнөөдөр сошиал сувгуудаар эл хэрэгт УИХ-ын гишүүн Х.Баттулга болоод УИХ-ын даргын зөвлөх  А.Гансүх нарыг холбогдуулан сэжигтнээр татан шалгаж байгаа гэх мэдээлэл түглээ.

Тэднийг эрүүгийн цагдаагийн хэлтсийн Эдийн засгийн гэмт хэрэгтэй тэмцэх хэлтсээс  байцааж эхэлсэн бөгөөд АТГ-т давхар хэрэг үүсгэсэн гэх мэдээлэл байгааг эх сурвалж дурджээ.
 

Юутай ч эл асуудлаар эргэн мэдээлэх болно.

24tsag.mn