Засгийн газрын өчигдрийн хуралдаанаар нэгтгэсэн байгууллагуудын удирдлагуудыг сонголоо. Тухайлбал, Улсын бүртгэлийн Ерөнхий газар, Үндэсний статистикийн хороог нэгтгэж даргаар нь С.Мэндсайханыг томилов. Харин  орлогчоор нь Улсын бүртгэлийн Ерөнхий газрын одоогийн дарга Ц.Пүрэвдоржийг томилсон байна. Уг хоёр байгууллагыг нэгтгэснээр тус газар нь Бүртгэл, статистикийн газар нэртэй болж байгаа юм. Үндэсний статистикийн хороог, Улсын  бүртгэлийн ерөнхий газартай  нэгтгэснээр хичнээн хүн ажилгүй болох нь одоогоор тодорхойгүй байна. Хэдхэн хоногийн өмнө статистикчид УИХ-ын дарга З.Энхболд, Ерөнхий сайд Ч.Сайханбилэг нарт албан бичиг илгээж, хэд хэдэн зүйлийг шаардсан. Статистикчид Засгийн газрын санал, УИХ-ын шийдвэрийг хариуцлагагүй хэмээн буруутгаж, ямар ч халаа сэлгээ хийхгүй байхыг хүссэн. Мөн шинээр байгуулагдах  Бүртгэл, статистикийн  ерөнхий газрын даргаар С.Мэндсайхан томилж, хэнийг ч халж сэлгэхгүй байхыг Засгийн газрын тэргүүнд “хатуу сануулсан”. Тэдний шаардлагыг үл тоомсорловол тэмцэнэ гэдгээ ч мэдэгдээд байсан. Ямартай ч тэдний хүсэлтийн дагуу С.Мэндсайханыг томилжээ. Харин ажилчдыг халах эсэх нь тодорхой бус байна.

Мөн Гаалийн Ерөнхий газар, Татварын Ерөнхий газрын даргаар Сангийн дэд сайд асан С.Пүрэв томилогдлоо. Харин Гааль хариуцсан орлогчоор н.Энхцогт, Татвар хариуцсан орлогчоор н.Даваасүрэн, Боомт хариуцсан орлогч захирлаар н.Бэхбат нар томилогджээ.

Тус байгууллагуудын удирдлагууд нь томилогдсон учир одоо хасах, танах ажлууд явагдах ёстой. Сангийн сайд Б.Болор нэгэнтээ “Эдгээр байгууллагуудыг нэгтгэж төсвөө хэмнэнэ” гээд зарлачихсан шүү дээ. Бүр 1.7 тэрбум төгрөгнийг хэмнэх боломжтой гэсэн урьдчилсан тооцоо байна. Тэгэхээр тодорхой хэмжээний ажилчид ажлаасаа халагдах нь тодорхой. ТЕГ, ГЕГ-ыг нийлүүлснээр нийт 300 орчим ажилтан ажлаасаа халагдана гэх мэдээлэл байгаа юм.

АН-ын мөрийн хөтөлбөр дэхь “Ажилтай, орлоготой монгол хүн” гээд байсан нь бодит амьдралд, ажилгүй, орлогогүй монгол хүн болж хэрэгжиж байна.

Тодруулбал, оны өмнөхөн ГЕГ-ын 150 гаруй албан хаагчдын халагдах тушаал гарсан гэсэн мэдээлэл байсан. Энэ талаар ГЕГ-ын холбогдох эх сурвалжаас тодруулахад, “Өнөөдрийн байдлаар ГЕГ-аас нэг ч албан хаагчийг халаагүй байна. ГЕГ-ын даргаар ажиллаж байсан О.Ганбат ажлаа хүлээлгэж өгөхөөс өмнө нэг ч хун халаагүй, тушаал гаргаагүй. Татварын ерөнхий газартай албан ёсоор нэгтгэсний дараа албан хаагчдын асуудлыг ярих байх. Гэхдээ өнөөдөр нэг дарга солигдоход төрийн албан хаагчдын нийгмийн асуудал хөндөгдөж байгаад харамсдаг. Гаалийн ерөнхий газрын 1500 гаруй албан хаагчдьн амьдрал энд яригдаж байна. Бид ерөнхийдөө хүлээлтийн байдалтай байгаа” гэв.

Харин Татварын ерөнхий газрынхан удахгүй халаа, сэлгээний асуудал эхэлнэ гэдгийг мэдэж байгаа аж. Тус байгууллагад ажлын байраа алдчихвий гэсэн албан хаагчид олон байгаа гэнэ. Ямартай ч хоёр агентлагийг нэгтгэснээр ойролцоогоор 250 гаруй төрийн албан хаагч ажилгүйчүүдийн эгнээнд шилжиж эдийн засгийн хямралыг жинхэнэ утгаараа амсах бололтой. Зарим албан хаагчид АН-ын мөрийн хөтөлбөр дэхь “Ажилтай, орлоготой монгол хүн” гээд байсан нь бодит амьдралд, ажилгүй, орлогогүй монгол хүн болж хэрэгжиж байна. Олон  хүнийг амьдралгүй, орлогогүй болгож буй уг шийдвэрээ эргэн харахыг хүсч байна гэх мэдээллийг өгч байна.

Ямартай ч тус хоёр байгууллагад ажилчид халах сургаар нилээн бужигнаан болж байгаа сурагтай. Уг бужигнаан улам даамжир, ширүүн эсэргүүцэлд ч хүрч магадгүй байна.

Т.Энхэлээ