Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104, Ардчилсан хувьсгалын 35 жилийн ой, Үндэсний их баяр наадмаас хойш хэд хэдэн наадам болов. 

Тодруулбал, Монгол улсад авто тээврийн салбар үүсэж хөгжсөний 100 жилийн ойд зориулсан барилдаан, Өндөр Гэгээний мэлмий гийсний 390 жилийн ойд зориулсан даншиг наадам, Увс аймгийн түүхт 100 жилийн ой баяр наадам, Төмөр замчдын наадам, ММСУХ-ны 30 жил, "Их Хурд 10" наадам, "Баянзүрх дүүрэг 60 жил" ойн наадам, "Ухаа худаг" наадам тус тус болжээ.

Тэгвэл эдгээр барилдаануудаас хэн нь хамгийн их шагнал, бай хүртсэн бол? Энэ талаар сийрүүлэв.

Шинэ арслан Э.Батмагнай баяр наадмаас хойш Өндөр гэгээний наадамд түрүүлж "LAND-300" автомашин, "Энержи Ресурс 20 жил", Ухаа худаг наадамд үзүүр булааж 35 сая төгрөгөөр шагнуулаад байна. 

Улсын заан Б.Бат-Өлзий дээрх барилдаануудаас Төмөр замчдын наадамд л барилдаагүй. Тэрбээр Авто тээврийн 100 жил, Өндөр гэгээний наадамд их шөвөгт шалгарч, Увс аймгийн 100 жил болон "Их Хурд 10" наадамд үзүүрлэсэн юм. Эндээс үзэхэд тэр наадмаас хойш хамгийн их шагнал хүртсэн хүн болоод буй.

Увсын 100 жилээс тэр 3 өрөө байр, "Их Хурд 10" наадмаас 8 сая төгрөг, Өндөр гэгээний наадмаас 35 сая төгрөг, Авто тээврийн 100 жилээс 10 сая төгрөг гарджээ. 

Улсын аварга О.Хангайгийн хувьд Авто тээврийн 100 жилд түрүүлж "Chevrolet" автомашин, "Их Хурд 10" наадамд түрүүлж 10 сая төгрөг, Өндөр гэгээний наадамд их шөвөгт үлдэж 35 сая төгрөгийн бай хүртжээ. Мөн Төмөр замчдын наадамд үзүүр булааж мөнгөн шагналаар шагнуулсан байна. 

Улсын арслан Б.Орхонбаярын хувьд Өндөр гэгээний наадамд үзүүрлэж, "Энержи Ресурс 20 жил" Ухаа худаг наадамд түрүүлж тус бүр 70 сая, нийт 140 сая төгрөг гардаад байгаа. 

Үндэсний их баяр наадмаар их шөвөгт шалгарсан Дархан аварга Н.Батсуурь баяр Увс аймгийнхаа түүхт 100 жилийн ой барилдаж түрүүлсэн. Тэрбээр уг наадмаас "LEXUS 600" автомашин авсан юм. 

Улсын арслан Ц.Бямба-Отгон улсын наадмаас хойш Авто тээврийн 100 жилд үзүүрлэж 30 сая төгрөг, Өндөр гэгээний наадамд шөвгийн наймд үлдэж мөнгөн шагнал, ММСУХ-ны 30 жил, "Их Хурд 10" наадамд их шөвөгт шалгарч мөнгөн шагнал тус тус хүртжээ. 

Улсын харцага О.Мөнх-Эрдэнийн хувьд Баянзүрх дүүргийн түүхт 60 жилийн ойд түрүүлж 12 сая төгрөг гардсан байна.

Эдгээр бөхчүүдээс гадна Увс аймгийн 100 жилийн ойд их шөвөгт шалгарч нэг, хоёр өрөө байр гардсан Улсын аварга П.Бүрэнтөгс, Улсын гарьд Ө.Бат-Орших нарыг дурдаж болох юм. 

Л.Баяр