Өнгөрсөн оны 11 дүгээр сарын 20-нд машинаа тавихаар гараад амиа алдсан байгаль хамгаалагч залуугийн үхлийн шалтгаан одоог хүртэл тодорхойгүй байгаа.
Тэгвэл Хөвсгөл далайд амиа алдсан 27 настай талийгаач Т.Лхагвасүмбэрэлийн гар утаснаас ноцтой хоёр бичлэг олдсон байна. Тэрхүү бичлэг хамгийн сүүлд машины хаалга хаагдаж гарсны дараа 10 цаг үргэлжилсэн бөгөөд машинд хэн ч эргэж ирээгүй талаар талийгаачийн өмгөөлөгч Ц.Баасандорж мэдэгджээ.
Түүнчлэн талийгаач залуу бусдын эрхэнд орсон учир баримт үлдээх үүднээс тэрхүү бичлэгийг хийсэн гэдгийг ч өмгөөлөгч нь өгүүлсэн байна. Ямартай ч гар утаснаас нь олдсон маш ноцтой хоёр бичлэгийг цагдаагийн байгууллагад өгч шалгуулж байгаа аж.
Дашрамд өгүүлэхэд талийгаачийн цогцос Хөвсгөл далайн эргээс дотогш 74 метрийн зайтай, доошоо дөрвөн метрийн гүнээс олдсон билээ. Уг хэргийг цагдаагийн байгууллага шалгаж байгаа бөгөөд Эрүүгийн хуулийн 95-р зүйл ангиар амиа хорлоход хүргэсэн эзэн холбогдогчийг хайж байгаа юм. Харин үүнийг талийгаачийн өмгөөлөгч эсэргүүцэж байгаа бөгөөд биологич залуугийн хэргийг Эрүүгийн хуулийн 91.2-т зааснаар хэрэг үүсгэж Улаанбаатар хотын Онц хүнд гэмт хэрэгтэй тэмцэх тасагт шилжүүлж өгөх хүсэлтийг ЦЕГ-т гаргаж байгаа аж.
Учир нь өмгөөлөгчийн үзэж буйгаар "Талийгаач Т.Лхагвасүмбэрэлийг сэтгэцийн өвчтэй. Тиймээс амиа хорлосон гэдэг дүгнэлт гаргах гээд байна. Хэрэв амь насыг нь санаатай хохироосон гээд хэрэг үүсгэчихвэл далайг бүхэлд нь самнана, далайг тойруулаад мөр хайна, Хатгал руу орж гарсан машиныг шалгана, далай дээр усан завь ашигласан хүмүүсийг байцаана гэх мэтээр ажиллагаа нүсэр болно. Ингээд байхад гэмт хэрэгтэн олдохгүй бол цагдаагийн байгууллага муу ажиллаж байна гэдэг нэр зүүнэ гэдэг хандлагаар цагдаа нар ажиллаж байж болох юм" гэдгийг ч хэлсэн байна.
