Долоо хоног бүрийн пүрэв гаригт болдог “Сайдын цаг” уулзалтад Шадар сайд Ц.Оюунбаатар оролцож өвөлжилтийн талаар мэдээлэл хийлээ. Түүнтэй хамт ЭМС-ын яамны Төрийн нарийн бичгийн дарга С.Ламбаа салбарынхаа асуудлаар мөн мэдээлэл өгсөн юм.
Шадар сайд Ц.Оюунбаатар ярихдаа “Одоогийн байдлаар 16 аймгийн 50 сум цагаан зудтай байна. 20 аймгийн 110 сум зудархуу байна. Дархан-Уул, Говьсүмбэр, Өвөрхангай, Орхон аймагт өвөлжилт хэвийн байна. Одоогийн байдлаар нийт нутгий 90 гаруй хувьд цасан бүрхүүл тогтож, 50 суманд зудын байдалтай байгаа аж. Цаашдаа 20-40 сум нэмж зуд болох магадлалтай байгаа аж. Өвөлжилт хүндэрсэн 16 аймагт хуваарилж байгаа хөрөнгийг зөв зохистой захиран зарцуулах, эрсдлийн бүсэд байгаа малчид, иргэдэд эрүүл мэнд, нийгмийн халамж, шуурхай албаны үйлчилгээг цаг алдалгүй хүргэхэд онцгойлон анхаарч, нэгдсэн удирдлагаар хангаж, авч хэрэгжүүлсэн арга хэмжээний тайланг Улсын онцгой комисст ирүүлэхийг өвөлжилт хүндэрсэн зарим аймгийн Засаг дарга, Онцгой комиссын дарга нарт үүрэг болгосон” гэв.
Харин Эрүүл мэнд, спортын төрийн нарийн бичгийн дарга С.Ламбаа “Оны өмнө Харвони эмийг эмчилгээнд нэвтрүүлэх ажлыг эхлүүлсэн. 1150 хүн эмчилгээнд орлоо. Энэ бол том ажлын эхэлэл. Мөн цахим эрүүл мэнд хөтөлбөр бол нэлээд цаг хугацаа алдаж байгаа. Гэхдээ эмнэлгүүдийг компютерээр хангах ажил эхэлсэн. Одоогоор Улсын клиникийн төв энмэлэгт 285 компютер нийлүүлсэн. Энэ бол тус эмнэлгийн бүх тасаг нэг төрлийн компьютерээр хангагдаад сүлжээнд холбогдож байна гэсэн үг. Бас нэг асуудал бол програмчлалын асуудал байна. Програмчлалыг хийснээр нийслэлийн эмч нар хөдөө орон нутгийн эмч нартай холбогдож болно гэсэн үг юм.Эрүүл мэндийн салбарт хамгийн гол анхаарал татсан асуудал бол шилэн дансны асуудал байна. Үүнийг эмнэлгийн байгууллага олон нийтэд харуулах зорилтыг дэвшүүлсэн, одоогоор зохион байгуулалтын ажлыг хийж байна” гэлээ.
Ийнхүү мэдээлэл хийсний дараа сэтгүүлчдийн асуултад хариулт өглөө.
-Он дамжаад явж байгаа царцсан эмнэлгийн байгууллага хэд байна вэ?
С.Ламбаа:-Эмнэлгийн барилгын асуудлыг Шадар сайд, Ерөнхий сайд бид гурав хамт зөвлөлдсөн. Хамгийн тулгамдаж байгаа асуудал бол Яармагт баригдаж байгаа 300 ортой эх хүүхдийн эрүүл мэндийн төв, Хоёрдугаар эмнэлгийн хашаанд баригдаж байгаа Үндэсний оношилгооны төв, Төрийн албан хаагчдын эмнэлгийн барилгын асуудал байна. Эдгээр асуудлыг гуравдугаар сарын 1-ны дотор шийдвэрлэх үүрэг даалгаврыг Ерөнхий сайд өгсөн. Тиймээс холбогдох хүмүүстэй уулзаж байгаа. Яармагийн барилгын хувьд концессийн гэрээгээр хийхээр сонгон шалгаруулалтыг явуулсан. Гэтэл үнэ өртөгийн байдлаас болоод тухайн компани гэрээгээ цуцлах асуудлыг ярьж байгаа учир сайдтай ярьж байгаад өөрөөр шийднэ. Ер нь заавал концессийн гэрээгээр шахахаас илүү Э.Бат-Үүл даргатай ярьж байгаад нийслэлд шилжүүлж ашиглалтанд оруулах талаас нь ярина. Төрийн албан хаагчдын эмнэлгийн барилгыг концессийн гэрээгээр хийхээр болсон. Одоогоор явц удаашралтай байна. Тиймээс нэгдүгээр эмнэлгийн удирдлагуудтай уулзаж ойрын хугацаанд шийдвэрлэх талаас нь ярилцана. Түлэнхийн төвийн хувьд энэ оны улсын төсөвт тодорхой хэмжээний мөнгө суулгасан. Энэ хавар гэхэд сууриа тавина. Үндэсний оношилгооны хувьд барилгын гүйцэтгэлийг Солонгосын компани хийхээр болсон. Гэвч мөн л ялгаа байхгүй зөрчилтэй байгаа.
-Зарим эмнэлэг удирдлагагүй байна. Энэ асуудлыг хэрхэн шийдвэрлэх вэ?
С.Ламбаа:-Эрүүл мэнд спортын яамны харьяа улсын төв эмнэлгийн удирдлагууд үүрэг гүйцэтгэгчээр ажиллаж байгаа юм бий. Манай яамны Төрийн албаны салбар зөвлөл бүрдэж байгаа, үүний дараа сонгон шалгаруулалт хийгээд явна.
-Ми-8 нисдэг тэрэгийн ослын шалтгаан тодорхой болсон уу?
Ц.Оюунбаатар: -Осол гарах үед холбогдох албаныхан шуурхай ажилсан. Техникийн осол гэмтлийн талаарх дүгнэлт эцэслэн гараагүй байгаа.
-Нэгдүгээр амаржих газрын шүүх эмнэлгийн дүгнэлт өчигдөр гарсан гэсэн. Шалтгааныг нь хэлэх боломж байна уу?
С.Ламбаа:-Эрүүл мэнд, спортын яаманд албан тоот ирээгүй байна. Хэрэв тус эмнэлгийн ажилчид буруутай бол хуулийн дагуу хариуцлагаа хүлээнэ.
-Г.Шийлэгдамба батлан даалтанд гарсан. Түүнийг ажлаа үргэлжлүүлнэ гэж зарим хүмүүс үзэж байна. Энэ боломжтой юу?
Ц.Оюунбаатар:-Хэдийгээр сайдгүй байгаа ч эрүүл мэндийн салбарын сахилга хариуцлага дээшилсэн. Г.Шийлэгдамбатай холбоотой асуудлыг Ерөнхий сайд бүрэн эрхийн хүрээнд шийднэ. Өөр хэн нэгний эрх хэмжээний асуудал биш. Эрүүл мэндийн салбарын үйл ажиллагаа хэвийн явагдаж байгаа.
Т.Энхэлээ
