Монгол Улсын Ерөнхийлөгч асан, МАХН-ын дарга Н.Энхбаярын “Монгол тулгатны 100 эрхэм” нэвтрүүлэгт орох үеийн хар дүрс “Херо” энтертайнмэнтийн архиваас алдагдсан нь олны анхаарал татаад байна.

Тэгвэл уг асуудалтай холбогдуулан “Херо” энтертайнмэнтийн захирал н.Баатар сэтгүүлчдэд мэдээлэл хийлээ. Тэрээр манай архиваас бичлэгүүд алдагдсан. Н.Энхбаярын болон өөр хэд хэдэн бичлэг алдагдсан. Архиваа алдаж, хариуцлагагүй байдал гаргасандаа "Херо" энтертайментийн өмнөөс Н.Энхбаяраас уучлал гуйж байна.  Хэргийг шалгаж байгаа тодорхой учраас өөр мэдээлэл өгөх боломжгүй байна. Н.Энхбаярын хар дүрсээс гадна С.Зориг агсны тухай баримтат кинонд ашиглаж байсан материал, скайнердсан файлууд алдагдсан. Энэ асуудлыг хуулийн байгууллагад шалгуулах болно” гэлээ.

Энэ үеэр тэрбээр сэтгүүлчдийн асуусан зарим асуултад хариулт өглөө. 

-“Монгол тулгатны 100 эрхэм нэвтрүүлгийн дүрс алдагдсаныг улс төрийн зорилгоор дотроосоо тараасан байж болзошгүй хэмээн хардах иргэд олон байна энэ талаар  та юу хэлэх вэ? 

-Бидний зүгээс өөрсдөө зорилготойгоор тараасан зүйл огт байхгүй. Би зүгээр л уран бүтээлч хүн өөрийнхөө уран бүтээлийг улс төрийн зорилгоор тараахгүй. Надад  улс төрд орох сонирхол ч байхгүй. Би уран бүтээлээ хийсээр л байх болно. Магадгүй ингэж хэлж байгаа хүн өөрөө хулгай хийсэн ч байж болно шүү дээ.

-Та бүхний хувьд хулгайг яг хэзээ орсон гэж таамаглаж байгаа зүйл байна уу?
-Бидэнд одоогоор тодорхой мэдэж байгаа зүйл алга. Ямар ч байсан маш нарийн зохион байгуулалттай бүлэглэлийн хийсэн хэрэг гэдэг нь дүрсүүдийг цацаж байгаагаас харагдаж байна. Бид та бүхэнд хүрэхээс хоёр, гурав хоног л устгах гэж 30-40 хүний бүрэлдэхүүнтэй багаараа ажлаад дийлсэнгүй. Youtube, Facebook-рүү утасдаж устгуулахаар байнга  ярьсан ч эргээд өөр акаунтаас ороод ирдэг. Манай сервер тийм ч амархан халдлагад өртөх газар биш. Тиймээс бид цагдаагийн байгууллага, оюуны өмчийн газар гээд  холбогдох бүх газруудад яаралтай арга хэмжээ авч, илрүүлж өгөхийг хүссэн. Цахим гэмт хэрэг гэдэг хэзээд ул мөр үлддэг учир удахгүй илрэх байх гэж найдаж байна. 

-Алдагдсан дүрс бичлэгүүдээс гадна өөр ямар, ямар дүрс бичлэг алдагдсан байгаа вэ? 
-Бид одоогоор яг хэний ямар дүрс алдагдсаныг мэдэхгүй байна. Магадгүй МУ-ын өөр ерөнхийлөгчийн дүрс ч алдагдсан байж магадгүй. Мөн бид С.Зориг агсны талаар баримтат кино хийх гээд материалууд цуглуулж  байсан. Тухайн үеийн сонинд гарч байсан хайчилбарууд гээд  нэлээд баримтууд байсан юм. Тэр болгоныг бид скайнердаад харданд хадгалсан байсан. Тэр байхгүй болсон. 

-Танай серверийг ямар компани хамгаалдаг байсан юм бэ? Тухайн компанид гомдолтой байна уу? 
-Энэ хулгайн хэрэгтэй холбоотойгоор бүх асуудлыг цагдаагийн байгууллагад мэдэгдсэн байгаа. Дахин хэлэхэд манай сервер тийм ч амар нэвтрэх боломжгүй. 

-Хардаж байгаа хүн бий юу? 
-Мэдээж хэрэг байгаа. Гэхдээ тэр болгоныг энд хэлээд байх хэрэггүй биз. Ямартай ч маш нарийн зохион байгуулалттай бүлэглэлийн хийсэн ажил. Одоо бүх зүйл тодорхой болоогүй шалгаж байгаа энэ үед тэр энэ гэж хэлэхийг хүсэхгүй байна. Мэдээж хэрэг хардаж байгаа зөндөө л хүн байна. 

-Н.Энхбаярын бичлэг цацагдсан нь яалт ч байхгүй улс төрийн  зорилготойг харуулж байна л даа. Түүний зүгээс танайд гомдол ирүүлсэн үү?
-Намбарын Энхбаярын талаар нэвтрүүлэг хийх нь яалт ч байхгүй зөв шүү дээ. Энэ хүний талаар нэвтрүүлгийг хийж эхлэхэд л маш олон дарамт шахалт манай хоёр хөтлөгчид болон надад ч ирж байсан. Хэд хэдэн улстөрчид над руу залгаж дарамталж байсан. Манай нэг хөтлөгч намын гишүүнчлэлтэй учир яг намын удирдлагууд нь биш юмаа гэхэд бусад гишүүд нь дарамт шахалт үзүүлэх зүйл байсан. Бид Н.Энхбаярыг мандаж явах үед нь  тал засаж нэвтрүүлэг хийгээгүй. Энэ хүнд тал зассан өнгө аястай ярилцсан гэж хүмүүс буруутгаж байна. Үнэхээр энэ хүний хүнд хэцүү цаг үед бид уулзаж, ярилцсан учир тиймэрхүү өнгө аястай ярилцсан. Одоогоор бидэнд ямар нэгэн байдлаар гомдол ирүүлээгүй байна. 

Д.Дуулим