Тэр хэзээ ч өмнө нь сонгуулийн сурталчилгаанд оролцож байсангүй. Энгэр дүүрэн гавьяатын тэмдэгтэй, эрээн мяраан торгон дээлтэй “оддын” чуулгад зогсоогүй тэрээр энэ сонгуулиар харин шинэ дуугаараа дуулиан тариад байна. Монголын хөгжмийн ертөнцийн өвөрмөц нэгэн том үзэгдэл болсон Бачка бас л онцгойрч чадлаа. Ардчилсан намын сонгуулийн сурталчилгаа болсон “Нар” дууны клипийг нь Ардын нам шүүмжилсний хариуг дуучин Б.Батчулуун ингэж өглөө.
“Нар” дуу таалагдахгүй байна гэж Ардын нам мэдэгдлээ. Та энэ мэдэгдлийг яаж хүлээж авав?-Харин нэг нартай өдөр ийм юм сонсдог байна. Миний дуунаас болоод хүүхдүүд сургуульдаа явах дургүй болж байгаа гэж зарим нөхөд цуурч байна лээ. Би энэ дууг 2009 оноос хойш нухсан юм. Эрх чөлөө, эх орны тухай миний тунхаглал бол “Нар” юм. Мал сүрэг, айраг цагаа, өндөр байшин, гоё хөгжил, болж байна, жаргая гэж би дуулаагүй. Би үгээ хэлсэн, дуугаа дуулсан. Харин 22 жилийн өмнө олж авсан энэ эрхийг минь хязгаарлах гэсэн энэ оролдлого гарч байна. Нар шиг мандах ёстой эрх чөлөөнд минь халдлаа гэж би бодож байна. Бодох сэтгэх эрх чөлөөг минь аль ч нам хязгаарлаж чадахгүй ээ. Хориглох, цензурдах дуршил нь зуршил болсон хүмүүст эрх чөлөө гэдэг эрхэм нандин зүйлийн тухай юу хэлэх вэ дээ.
“Нар” дууг youtube сайт дээр байрлуулснаас хойш татаж авсан хүмүүсийн тоо 20 мянга хүрэх гэж байна. Энэ бол ийм богино хугацаанд маш өндөр үзүүлэлт. Иыйм хурдан хүмүүст хүрнэ гэж тооцож байсан уу?-Харин наадах чинь л эрх чөлөө бидэнд нар шиг хэрэгтэй гэдгийн нэг том нотолгоо юм биш үү? “Нар” дуу бол миний эрх чөлөө. “Нар”-ын клип бол On&off-ын, С.Ононбатын эрх чөлөө. Харин тэд “Нар байхгүй” гэж хэлж байна. Уучлаарай, нар байгаа. Цаашид ч байна. Байлгахын төлөө бид дуулна. Нарыг халхалж чадахгүй ээ.
