УИХ дахь МАН-ын бүлгээс "Тэтгэвэр, цалингийн, малчны зэрэг бүх төрлийн зээлийн хүүг нэг оронтой тоонд оруулах"-ыг УИХ-ын дарга, Ерөнхий сайд, Монгол банкны Ерөнхийлөгчөөс шаардсан.
Тэгвэл тус бүлгийн шаардлагыг өнөөдөр Эдийн засгийн байнгын хорооны өнөөдрийн хуралдаанаар хэлэлцлээ. Мөн уг хуралдаанд Ерөнхий сайд Ч.Сайханбилэг, Монголбанкны ерөнхийлөгч Н.Золжаргал нар оролцож мэдээлэл хийн, гишүүдийн асуултад хариуллаа.
"Монгол банк"-ны ерөнхийлөгч мэдээлэлдээ "Монголбанкнаас сүүлийн 3 жилийн хугацаанд дундаж давхаргын хуримтлалыг нэмэгдүүлэх, эдийн засаг дахь нийт хуримтлалыг дэмжихийн тулд зээлийн хүүг бууруулах бодлого барьж ажилласан. Гурван жилийн өмнөхтэй харьцуулахад, инфляцийн дарамт багасч, 2.9 хувь руу орж ирсэн байна. Өөрөөр хэлбэл, 2013 оны зургадугаар сард жилийн 8 хувийн хүүтэй ипотекийн зээлийг хэрэгжүүлж эхлэхэд инфляци 14 хувьтай байсан бол одоо 2.9 хувь руу орсон. Энэний үр дүнд 80 мянган айл өрх ипотекийн зээлд хамрагдсан. Үр дүнд нь дундаж орлоготой өрхийн тоо өссөн. Тодруулж хэлбэл, 2011 онд сарынх нь орлого 2.3 сая төгрөгт хүрдэг дундаж амьдралтай өрхийн тоо нийт өрхийн 39 хувийг эзэлдэг байсан бол өнөөдөр 70 орчим хувьд хүрсэн аж. Тиймээс энэ төрлийн ипотекийн зээлийн хүүг бууруулах нь үр дүнд хүрнэ гэж үзэж байна.Цаашид эдийн засгийн тогтвортой өсөлтийг хангахын тулд Монголбанкнаас хэрэглээг дэмжсэн биш, харин ажлын байр нэмэгдүүлсэн, хуримтлал, экспортыг дэмжих зорилгоор зээлийн хүүг бууруулахад чиглэсэн бодлого хэрэгжүүлнэ" гэлээ.
Энэ үеэр Ерөнхий сайд Ч.Сайханбилэг "Хоёр долоо хоногийн өмнө энэ чиглэлээр Монголбанк болон бусад холбогдох байгууллагуудад үүрэг өгсөн. Малчны зээл дээр тодорхой гарц хайсан. 240 орчим тэрбум төгрөгийн малчны зээл ХААН, Төрийн гэсэн хоёр үндсэн банкнаас гарсан. Эдгээр банкнаас гарч байгаа зээлийн бүтэц нь сарын 2.5 хувийн хүүтэй. Энэ нь маш өндөр хүү. Малчид эргээд үйлдвэрлэл, мал аж ахуйгаа хөгжүүлэхэд хүндрэлтэй. Монголбанк бусад холбогдох байгууллагатай ажилласны үр дүнд жилийн 30, сарын 2.5 хувийн хүүтэй энэ зээлийг бууруулна. Ялангуяа Төрийн банкны үйл ажиллагааг чиглүүлж, жилийн 30 хувийн хүүг 10 хувь болгох бололцоо байгаа. Энэ чиглэлээр ажлууд явагдаж байна. Малчдын баяр гэж ярьдаг цагаан сарын өмнө энэ зээлийн хүүг 30-аас 10-руу оруулах асуудлыг шийдэх боломжийг Засгийн газар эрэлхийлж байна" гэв.
Т.Энхэлээ
