Нийслэлийн Засаг дарга, Улаанбаатар хотын дарга Г.Мөнхбаяр, түүний баг Нийслэлийг аюулгүй, гэмт хэрэггүй, айж эмээхийн зовлонгүй,  амар амгалан амьдрах  тийм  гоё сайхан  хот байлгахаар дөрвөн жилийн өмнө нийслэлчүүдэд  амлалт өгч, Улаанбаатар хотын  “мээр” хэмээх өндөр суудалд  заларч чадсан. Гэтэл нийгэмд учруулж буй аймшиг, аюул, осол, үхэл хагацал,  хорт уршгаараа улсын Нийслэл  улсад тэргүүлж байна. “Гэмт хэрэг, айх аюул, аваар ослын   бөөгнөрсөн голомт” нь хаана байна вэ  гэвэл нийслэл Улаанбаатар хот болчихоод байгааг Цагдаагийн байгууллагын статистик үзүүлэлт хэлж байна.
  Нийслэлд сүүлийн ганцхан  жилд 100.672  гэмт хэрэг гарчээ. Мөн Улаанбаатарт хоёр цаг тутамд нэг хүн нас барж, хоёр хүн ямар нэгэн байдлаар хүнд хөнгөн гэмтэл авч, эрүүл мэндээрээ хохирч байна. Улсын хэмжээнд сүүлийн зургаан жилийн байдлаар зам тээврийн осолд 4089  хүүхэд  өртсөний 3639 нь нийслэлд өртжээ.

    Бүлэглэсэн, зохион байгуулалттай, харгис хэрцгий адал балмад танхайн сэдэлттэй  онц хүнд, хүнд гэмт хэргийн  гаралтын тоо өсч,  бусдын амь насыг  санаатайгаар хөнөөсөн, гэмтэл учруулсан,   хүчин, танхай, хулгай, дээрэм, залилан, авто ослын, албан тушаалын, авлигын гэмт хэрэг өссөний дийлэнх нь Нийслэлд төвлөрч  байна. Хүн эсэн мэнд байж л зорьсон  үйлсийнхээ  төлөө   зүтгэнэ. Бидэнд амьд байх нь юунаас ч түрүүн чухал байна.  Тиймээс чимээгүй дайны хөлд  амь эрсдэх орчинд нийслэлийнхэнийг амьдруулж буй Г.Мөнхбаяр түүний багийнханыг дахин сонгохгүй, харин зөвхөн амьд байх төдий бус амар амгалан амьдрах баталгааг бий болгож чадах хүнийг сонгочих юмсан, сонгогчид оо.