Өнөөдөр болох зарим үйл явдлыг танилцуулж байна.
09:00 цагт: Нийслэлийн иргэний танхимд "Гэмт хэргээс урьдчилан сэргийлэх" зөвлөгөөн болно. Зөвлөгөөний үеэр Улаанбаатар хотын гэмт хэргийн нөхцөл байдал, түүнээс урьдчилан сэргийлэх чиглэлээр хийсэн ажлууд болон хулгайн гэмт хэргийн гаралт, түүний шалтгаан нөхцөл, урьдчилан сэргийлэхэд анхаарах асуудлын талаар холбогдох газрынхан мэдээлэл өгч, хэлэлцүүлэг зохион байгуулна.
09:00 цагт: АШУҮИС-ийн Оюутны соёлын төв "Эрдмийн Чуулган-58" эмнэлзүйн салбарын чуулган болно. Энэ үеэр эрдэмтэн багш, судлаачдын 80 гаруй эрдэм шинжилгээ, судалгааны ажлын шилдэг үр дүн, 14 ховор сонирхолтой эмнэлзүйн тохиолдолын илтгэлийг гурван салбар хуралдаанаар хэлэлцүүлэх юм байна.
11:30 цагт: Хангарьд ордонд Нийслэлийн Өмчийн харилцааны газраас зуслангийн газрыг иргэдэд өмчлүүлэх ажилтай холбогдуулан мэдээлэл хийнэ.
12:00 цагт: БХБЯ дээр Сайд З.Баянсэлэнгэ АНУ-аас Монгол Улсад суух Онц бөгөөд бүрэн эрхт Элчин сайд Женифер Зимдал Галттай уулзана.
15:00 цагт: "Эрдэнэс Монгол" ХХК-ийн байранд Монгол Улсын Уул уурхайн яам болон Их Британийн Худалдаа, хөрөнгө оруулалтын газар Монгол Улсын олборлох салбарын хөгжилд хамтран ажиллах цаашдын боломжийн талаар харилцан санал солилцох зорилго бүхий эрмэлзлийн бичигт гарын үсэг зурна.
