Налайх дүүргийн прокурорын газраас олны анхаарал татсан, онц хүнд гэмт хэргүүдийг шүүхэд шилжүүлж, шийдвэрлүүлжээ.

  Эрүүгийн төлөөлөгчийн аминд хүрсэн этгээдийг чанга дэглэмтэй хорих ангид хорино

Үүнд: Налайх дүүргийн 6 дугаар хорооны  "Горхи-Мэлхий хад" нэртэй амралтын газарт 2015 оны 10 дугаар сарын 09-ны өдөр Эрүүгийн цагдаагийн газрын бодлого төлөвлөлтийн хэлтсийнхэн ажилтнууд  хамт олноороо амарч байх үед Ө гэгч нь иргэн Х-г  цохиж алсан гэмт хэрэг үйлдэгдсэн байна.

Дээрх хэргийг прокуророос хянаж шүүхэд шилжүүлсэн бөгөөд Багахангай, Налайх дүүргийн Эрүүгийн хэргийн анхан шатны шүүх 2016 оны 03 дугаар сарын 31-ны өдөр  хянан хэлэлцэж, хуралдааны явцад  13 гэрч, 1 хохирогч, 2 шинжээч, 1 иргэний хариуцагчийг  шүүх хуралдаанд оролцуулж, шүүхийн хэлэлцүүлгийг явуулсан байна.

Шүүх  хуралдаанд улсын яллагчаар оролцсон хяналтын прокурор Г.Энхтүвшин, Б.Тогтох нар уг гэмт хэргийг шүүгдэгч Б.Өлзийбуян үйлдсэн болохыг нотлох баримтанд тулгуурлан яллаж, Эрүүгийн хуулийн тусгай ангийн 91 дүгээр зүйлийн 91.1 дэх хэсэгт зааснаар 15 жилийн хорих ял оногдуулж,  чанга дэглэмд эдлүүлэх санал тавьсаний дагуу шүүхээс  шүүгдэгчийг гэм буруутайд тооцож, түүнд 15 жилийн хорих ял оногдуулж, чанга дэглэмтэй эрэгтэйчүүдийн хорих ангид ялыг эдлүүлэхээр шийдвэрлэжээ.

  Насанд хүрээгүй хүүхдийн дэргэд Хорих ангийн хянагчийг хөнөөсөн этгээдэд ял оноолоо

Мөн тус дүүргийн прокурорын газраас яллах дүгнэлт үйлдэж шүүхэд шилжүүлсэн Н-д холбогдох хэргийг шүүхээр хянан хэлэлцэж Эрүүгийн хуулийн тусгай ангийн 91 дүгээр зүйлийн 91.2 дахь  хэсэгт зааснаар 20 хорих ял оноожээ. Н-нь хүнд хэрэгт 6 удаа ял шийтгүүлж 17 наснаасаа 39 нас хүртлээ хорих ял эдэлж байсан ба 2015 оны 09 дүгээр сарын 21-ны өдөр Багахангай дүүргийн 1 дүгээр хорооны 15 дугаар байрны 35 тоотод оршин суух Ц.Пүрэвдоржийн гэрт архи уухаар ороход нь Мөнгөнморьтын хорих ангид ял эдэлж байхад нь хянагч байсан Б.Анхбаатар тааралдаж, хоорондоо  маргалдсаны улмаас  айлын гал тогооноос хутга авч 15 настай А-гийн нүдэн дээр А-г алсан гэмт хэрэг үйлдсэн байна. 

Дээрэм хийсэн ул мөрөө арилгахын тулд гэдсийг нь тасартал өшиглөжээ

Мөн 2015 оны 09 дүгээр сарын 18-наас 19-нд шилжих шөнө иргэн Б-г Налайх дүүргийн 2 дугаар хорооны нутаг дэвсгэрт гэр рүүгээ харихаар явж байх үед нь үл таних этгээдүүд хүч хэрэглэн дээрэмдэж, 2 ширхэг гар утас, бэлэн мөнгө, үнэмлэх бичиг баримтуудыг нь авчээ. Улмаар "хэрэг илэрч магадгүй гүйцээе" гэж харанхуй газарт аваачин гэдсийг тасартал нь өшиглөн хүнд гэмтэл учруулан, ухаан алдаад хөдлөхгүй болсон үед нь орхиж явсан гэмт хэрэг үйлдсэн байна. Хэргийг тус дүүргийн Цагдаагийн газрын албан хаагч нар  гурван сарын дараа нөхөн илрүүлж , Э гэгч нь  бусадтай  бүлэглэн үйлдсэнийг  нь тогтоосон байна. Хэрэгт хяналтын прокурор Г.Энхтүвшин хяналт тавьж яллах дүгнэлт үйлдэн шүүхэд шилжүүлсэн ба шүүхээс уг хэргийг өнөөдөр шүүх хуралдаанаар хэлэлцэхээр товлосон байна.

Эдгээр онц хүнд, ээдрээ төвөгтэй, олны анхаарал татсан, хэвлэл мэдээлэлд нийтлэгдсэн, Улсын ерөнхий прокурорын газрын  болон Нийслэлийн прокурорын газрын давхар хяналтанд орсон хэргүүдэд тус дүүргийн Прокурорын газрын ахмад, туршлагатай прокурор Г.Энхтүвшин хяналт тавьж ажилажээ.